Ramazan vaqtında Türkiyeden kelgen imamlar qırımtatarlarnıñ cemaatlarında çalışacaqlar
Bunı Qırım.Aqiqatqa Qırım Muhtar Cumhuriyeti musulmanlarınıñ diniy idaresi (QMC MDİ) muftisi Ayder Rustemov bildirdi.
Mufti: «Diyanet (Türkiyeniñ din işleri boyunca idaresi – QA) ile añlaşma boyunca Ukrainağa dört afız (Qurannı ezberden bilgen kişi – QA) kelip, bizim cemaatlarımızda çalışacaq. Türkiy imamları Herson vilâyetiniñ cenübinde ve Ukrainanıñ ğarbındaki qırımtatarlar toplu yaşağan yerlerde çalışacaqlar», – dedi.
O, imamlarnıñ kelmesi, Ukraina medeniyet nazirligi ve diger devlet organları ile uzlaştırıldı, dep bildirdi.
2018 senesinde Ramazan ayı orazası mayıs 16-dan iyün 15-ke qadar devam etecek.
2016 senesiniñ noyabrinde Qırımdan mecburen köçken musulmanlarınıñ cemaatları qurultay keçirip, Ukrainanıñ qıtadaki qısmında Qırım Muhtar Cumhuriyeti musulmanlarınıñ diniy idaresini meydanğa ketirmege qarar berdiler. Mufti vazifesine Ayder Rustemov saylandı.
2017 senesiniñ oktâbrinde Ukraina Medeniyet nazirliginiñ milletler ve dinler departamenti Rustemov başlığındaki Qırım Muhtar Cumhuriyeti musulmanlarınıñ diniy idaresini resmen qayd etti.