Qırım cemiyetine birleştireci ğaye kerek – aq-uquq qorçalayıcısı

Qırım cemiyetinde konstruktiv birleştirici ğayege talap bar. Aynı zamanda yarımadada ealiniñ vatandaş faalligi artmaqta. Bu fikirni aq-uquq qorçalayıcısı Abdureşit Cepparov aprel 20-de Qarasuvbazarda «İnsan aqları boyunca Qırım alâqa gruppası»nıñ teşebbüsi ile ötkerilgen faaliyetçiler ve cemaatçılarnıñ körüşüvinde ifade etti, dep bildire Qırım.Aqiqat muhbiri.


Cepparov: «2014 senesini hatırlasaq, o zaman Qırımda vatandaşlar cemiyeti yerinde vakuum peyda oldı. Şimdi Qırımda vatandaşlar faalligi yavaş-yavaş artmaqta. Em aq-uquq qorçalayıcıları, em aq-uquq qorçalayıcılarınıñ advokatları, em mustaqil siyasetşınaslar, em blogerler, em strimerler, em faaliyetçiler, em cemiyetçiler bar… Bu şaraitte cemiyette birleştireci ğayege talap doğdı», – dep saya.


Tedbirde iştirak etken advokat Mammet Mambetov, Qırım vatandaşlar cemiyetiniñ bütün yañı teşebbüsleri şimdilik «bir de-bir belânıñ neticeleri oldı», dep qayd etti.


«Artıq mevcüt olğan vatandaş teşebbüsleri ve birleşmeleriniñ peyda oluv tarihına köz taşlasaq, olarnıñ episiniñ bir de-bir belânıñ neticeleri olğanlarını körecekmiz. «İnsan aqları boyunca Qırım alâqa gruppası» Qırımda bir sıra insanlarnıñ alıp qaçılğanından soñ peyda oldı, «Qırım birdemligi» bir sıra musulmanlar tevqif etilgen soñ peyda oldı, «Bizim balalar» – Qırım siyasiy mabüslerine yardım etmek içün meydanğa ketirildi», – dep qayd etti advokat.


Qırım Rusiye tarafından ilhaq etilgen soñ mustaqil jurnalistler, vatandaş faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqaları bar dep şübhe altında tutulğan Qırım musulmanlarınıñ evleri ketken sayın daa sıq olaraq kütleviy surette tintilmekteler.