Ժամանակն է վերջ դնելու Ցեղասպանության հարցում Ամերիկայի՝ «նախ Թուրքիան» մոտեցմանը. 102 կոնգրեսական ստորագրել է Թրամփին ուղղված նամակը
ԱՄՆ Ներկայացուցիչների պալատի 102 կոնգրեսական, այդ թվում՝ պալատի արտաքին հարաբերությունների և հետախուզական հարցերով հանձնաժողովների նախագահները, կոչ են արել ԱՄՆ նախագահ Դոնալդ Թրամփին անտեսել Թուրքիայի ճնշումներն ու ազնվորեն և հավուր պատշաճի ոգեկոչել Հայոց ցեղասպանության 103-րդ տարելիցն իր ապրիլքսանչորսյան ելույթի ժամանակ: Այս մասին հայտնում է Ամերիկայի «Հայ դատի» հանձնախումբը:
«Ժամանակն է վերջ դնելու Հայոց ցեղասպանության հարցում Ամերիկայի «նախ Թուրքիան» մոտեցմանը: Էրդողանի ավանդական կողմնակիցները լքել են նրան, և դա արդարացի է: Զրկվելով դաշնակիցներից ամերիկյան քաղաքական դաշտում՝ նա շրջվում է դեպի Սպիտակ տուն՝ որպես պաշտպանության իր վերջին գիծը՝ ճշմարտության դեմ: Ընտրությունը նախագահ Թրամփին է մնում՝ Ամերիկան առաջին տեղում դասել կամ տեղի տալ օտար ճնշումներին», - ասել է Ամերիկայի «Հայ դատի» հանձնախմբի գործադիր տնօրեն Արամ Համբարյանը:
Թրամփին ուղղված նամակում, որը ներկայացրել են Կոնգրեսի հայկական հարցերով աջակցության խմբի համանախագահներ Ֆրենկ Փալոնեն, Ջեքի Սփիըրը, Դևիդ Թրոթը և Դևիդ Վալադոն, ինչպես նաև փոխնախագահներ Գաս Բիլիրակիսը և Ադամ Շիֆը, ասվում է. «Հայոց ցեղասպանությունը շարունակում է կարևոր հիշեցում լինել առ այն, որ մարդկության դեմ հանցագործությունները չպետք է առանց ճանաչման և անպատիժ մնան»: