Jumadilov: mayıs 18-ge qadar iş gruppası qırımtatar milliy muhtariyeti aqqında metinni uyğunlaştırmaq mümkün

Esas qanunnıñ QMC qısmı içün tüzetmeler ve deñişmeler işlep çıqqan Ukarina Anayasa komissiyasınıñ iş gruppası mayıs 18-ge qadar uzlaştırılğan metinni azırlaycaq. Bunı Qırım.Aqiqat Radiosı efirinde Qırımtatar Milliy Meclisi başlığınıñ mesleatçısı Arsen Jumadilov bildirdi.


Meclis başlığınıñ mesleatçısı: «Aprel 18-deki vaziyetke köre, bazı sualler doğurğan bir qaç madde tasdiqlandı. Kelecek afta da bunıñ üstünde çalışacaqmız. Teessüf ki, iş gruppası azalarınıñ episi oturışuvlarğa intizamlı surette kelmeyler. Şu cümleden, bazı devlet deputatları belli olmağan sebepten dolayı muşaverelerge itibar etmey. Bütün bu inceliklerni köz ögüne alıp, mayıs 18-ge qadar bizde iş gruppası seviyesinde uyğunlaştırılğan metin azır olacaq, ve biz onı Anayasa komissiyasınıñ muzakeresine teslim etecekmiz, dep tahmin etmek mümkünim», – dedi.




2017 senesi mayıs 18-de, qırımtatarlarnıñ sürgün etilmesi yıllığında, Ukraina prezidenti Petro Poroşenko, anayasada Qırım statusınıñ deñiştirilmesi aqqında qanun leyhası azır olğan soñ bu vesiqanı aman Yuqarı Radanıñ baqılması içün bermege azır olğanını bildirdi.


Keçken sene Anayasa komissiyası, Ukraina Anayasasına Qırımnıñ deokkupatsiyadan soñki statusına dair deñişmelerni işlep çıqmağa başladı. Deñişmeler, yarımadanıñ tamır halqı – qırımtatarlarda – öz vatanlarında Ukraina devletiniñ sıñırları içinde öz taqdirlerini tayin etüv aqqı olğanını nazar-itibarğa alalar.


Keçken sene Anayasa komissiyasınıñ iş gruppası, Ukraina Anayasası içün deokkupatsiyadan soñ Qırımnıñ statusına dair tüzetmeler işlep çıqmağa başladı. Deñişmeler, yarımadanıñ tamır halqı – qırımtatarlarnıñ – öz Vatanında Ukraina devletiniñ sıñırları içinde öz taqdirini tayin etme aqqını nazar-itibarğa alıp, azırlandılar.