Նիկոլ Փաշինյանի պահանջները հակասահմանադրական են. Մոդեստ Կոլերով
Նիկոլ Փաշինյանի պահանջները հակասահմանադրական են: Tert.am –ի հետ զրույցում նման տեսակետ հայտնեց ռուսաստանցի քաղաքագետ Մոդեստ Կոլերովը:
Հարցին, թե արդյո՞ք անհրաժեշտ համարում է, որ իշխանությունները զիջումների գնան, և ինչպես ձևակերպված է Նիկոլ Փաշինյանի պահանջներում՝ հաստատվի ժամանակավոր կառավարություն ու արտահերթ խորհրդարանական ընտրությունների անցկացվեն, ռուսաստանցի քաղաքագետը նկատեց. «Սա հակասում է Սահմանադրությանը: Այսքան բան։ Եվ, եթե Նիկոլ Փաշինյանն ունի իր տեսակետն այն ամենի վերաբերյալ ինչ կատարվում է, ուրեմն ինչո՞ւ էր մեկ տարի շարունակ լռում: Ինչո՞ւ միայն հիմա սկսեց ըմբոստանալ, երբ վարչապետի ընտրություն եղավ՝ համաձայն օրենքի և Սահմանադրության»:
Դիտարկմանը, որ հարցը միայն Նիկոլ Փաշինյանը չէ, այլ ՀՀ քաղաքացիները, քաղաքական ուժերը, որոնք ի տարբերություն սահմանադրական փոփոխությունների ժամանակ «Ելքի» տեսակետի, կեղծ օրակարգ չեն համարել այն, Մոդեստ Կոլերովը նկատեց՝ ինչո՞ւ էին ՀՀ մյուս քաղաքացիները 1 տարի շարունակ լռում, ինչո՞ւ չէին ըմբոստանում:
Ճշգրտմանն էլ, որ ոչ նման մեծամասշտաբ, բայց այս հարցի հետ կապված ըմբոստություն միշտ եղել է, ռուսաստանցի քաղաքագետը հարցրեց՝ ինչ է՝ իրենք փողո՞ց էին փակում: Եվ, եթե անգամ իրենց ամբողջ աշխարհը միանա, միևնույն է՝ դրանից բան չի փոխվի, նրանք մեկ տարի շարունակ լռել են:
Ինչ վերաբերում է նոր ընտրություններին պահանջին, ապա քաղաքագետը նշեց. «Լավ, նոր ընտրություններ եղավ, էլի մարդիկ կգտնվեն, որ դժգոհ կլինեն, նորից նոր ընտրություններ պե՞տք է անցկացվեն։ Դուք երբևէ կապրե՞ք համաձայն Սահմանադրության»:
Մոդեստ Կոլերովը իրատեսական չի համարում, որ հեղափոխությունը կհասնի արդյունքների, և Սերժ Սարգսյանը հրաժարական կտա: