«Rusiye Qırımnı bir büyük apishanege çevirdi» – Ahtem Çiygoz

Aprel 16-da Nyü-Yorkta BMTniñ Tamır halqları boyunca daimiy forumınıñ on yedinci sessiyasında Qırımtatar Milliy Meclisi reisiniñ muavini Ahtem Çiygoz ilhaq etilgen Qırımdaki vaziyet aqqında ikâye etti. Bu hususta Ukrainanıñ BMT yanındaki daimiy temsilciliginiñ Twitterinde bildirile.


Çiygoz: «Rusiye Qırımnı bir büyük apishanege çevirdi. Rusiyeniñ işğali altında balalarımıznıñ kelecegi yoq. Dünya toplulığı, Ukrainağa ait yarımadanıñ işğalini alıp taşlamaq maqsadınen Moskvağa tazyiqını devam etmek kerek», – dep qayd etti.




Aq-uquq qorçalayıcılarınıñ malümatına köre, bugün Rusiye territoriyasında ve onıñ tarafından işğal etilgen Qırımda 60 qadar Ukraina vatandaşı siyasiy sebepten azatlıqtan marum etildi. Ukrainanıñ Tış işleri nazirligi Rusiyege, anda bulunğan Ukraina vatandaşlarını azat etmek talabınen 300 resmiy mektüp yolladı.


SBUda, yanvarniñ soñundaki vaziyetke köre, ukümetniñ kontroli altında olmağan Donbass territoriyalarında 108 kişi rein sıfatında buluna, dep bildire ediler.


Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevral 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbr 7-de Ukraina prezidenti Petro Poroşenko munasip qanunnı imzaladı.