Jamala «Krıla» (qanatlar) adlı yañı single çıqardı
Yırcınıñ matbuat hızmeti haber etkenine köre, «Krıla» türküsi «er kes başqa insanlarnıñ yardımına muhtac olğanı aqqında».
«Men selfmade ibaresini sevmeyim, çünki, men bellesem, o kerçek degil ve bizlerni başqalarğa nazaran yükselte. Epimiz muayyen bir ailelerde dünyağa kelemiz, ana-babamız bizlerge yol köstere, terbiyeley, bizge öz sevgisini bere. Ayatımıznıñ er basamağında bizge yardım etken, ilham ve qanat bergen insanlar rastkele», – dep bildire Jamalanıñ sözlerini matbuat hızmeti.
Olar bergen malümatqa binaen, türküniñ muzıkasını Jamalanıñ özü, sözlerini ise, Tatyana Milimko yazğan eken.
Yırcınıñ yañı türküsini Apple Music, Google Play, Deezer, Youtube, Soundcloudte tapmaq mumkün.
Jamalanıñ bundan evelki «Sumuyu» (Canım sıqıla) adlı singlı 2017 senesi sentâbr ayında çıqqan edi. Aynı isim altındaki kompozitsiyadan ğayrı, oña «Lübıtı» (Sevmek) türküsi de kirdi.
Ayrıca Jamala «Vıkradena printsesa: Ruslan i Lüdmila» (Hırsızlanğan printsesa: Ruslan ve Lüdmila) adlı ukrain multfilminiñ soñunda qullanılğan, «Tı lübov moya» (Sen menin sevgimsim) türküsini icra etti. Filmniñ numayışı martnıñ 7-nde keçirilecek.