Ukraina TİN Radağa Rusiye saylâvlarını qanunsız dep tanımamağa teklif ete
O, Rusiye prezident saylâvlarınıñ qanunsız dep tanılması neticesinde, tiş işleri nazirliginiñ Rusiyede Ukraina vatandaşlarını, hususan, qanunsız olaraq mahküm etilgen şahıslarnı imaye etüv fursatına menfiy tesir etebilecegi aqqında ayttı.
«Tış işleri nazirligi Ukraina topraqlarınıñ bir qısmını ilhaq etip aluv teşebbüsini tanımayuv siyasetini devam ettire ve işğal etilgen topraqlarda Rusiye Federatsiyası prezidentiniñ saylâvlarını qanuniy dep tanımay, bu ise bu topraqlarnıñ Ukrainağa ait oluv statusını deñiştirüv ya da tasdıqlavına fursat bermeycegini köstere», – dey Şevçenko.
Onıñ sözlerine köre, Rusiye saylâvlarınıñ faqat Qırım sıñırları içinde keçkenini tanımamaqnen bağlı qarar leyhası, Demokratik institutlar ve insan aqları Bürosı (DİİAB)/OSCEnıñ Rusiyede keçken prezident saylâvlarınıñ bütünley qanunsız olğanı aqqındaki hulâsalarına yaqınlaşa.
Ukraina parlamentinde Rusiye saylâvlarını tanımamaqnen alâqalı eki qarar leyhası qayd etildi. BPP deputatları saylâvlarnı tek işğal etilgen Qırımda qanunsız dep tanımağa, «Narodniy front» deputatları ise bütünley qanunsız dep tanımağa teklif eteler.
Rusiye prezidentiniñ saylâvları martnıñ 18-nde ötkerildi. Ukraina ile halqara teşkilâtlar yarımadada keçken «saylâvlarnı» tanımaycağına dair narazılıq beyanatlarına baqmadan, Rusiye ükümeti ilhaq etilgen Qırımda da saylâvlar keçirdi.
İlk malümatqa binaen, Vladimir Putin saylâvlarda 76,7 faiz rey qazanaraq, artıq dördünci sefer prezident olaraq saylâna.