Քաբուլում մահապարտ ահաբեկիչը պայթեցրել է իրեն համալսարանի մոտ. կա 26 զոհ և 18 վիրավոր
Աֆղանստանի մայրաքաղաք Քաբուլի համալսարանի մոտակայքում մահապարտ ահաբեկիչը պայթեցրել է իրեն՝ գարնան և նոր տարվա տոնի՝ Նովրուզի տոնակատարության ժամանակ:
Ինչպես նշում է Reuters գործակալությունը, ահաբեկչության զոհ է դարձել 26 մարդ, ևս 18-ը վնասվածքներ է ստացել:
Աղբյուրը մանրամասնում է, որ դեպքի վայրում են ոստիկանության աշխատակիցներն ու բուժաշխատողները: Թաղամասն արգելափակվել է:
«Հուժկու պայթյուն տեղի ունեցավ, ու ես տեսա՝ ինչպես են մարդիկ փախչում», - ասել է միջադեպի ականատեսներից մեկը:
Աֆղանստանի ՆԳ նախարարության մամուլի քարտուղար Նաջիբ Դանեշի խոսքով՝ հարձակվողը մտադիր էր հասնել սրբատեղի, որտեղ նշվում էր տոնը, սակայն նա չի անցել ոստիկանության անցակետերով:
Նշվում է, որ դեռ ոչ մի ահաբեկչական խմբավորում չի ստանձնել պայթյունի պատասխանատվությունը: