Россияда 13 нафар қирғизистонлик аёл қулчиликдан қутқарилди
Қирғизистон Ички ишлар вазирлиги матбуот котиби Бакит Сейитовнинг 19 март куни Озодлик радиоси қирғиз хизматига билдиришича, аёллар ўтган ҳафтада озод қилинган.
Иш берувчи уларнинг паспортларини олиб қўйган ва ҳаракат эркинлигини чеклаган. Аёллар қулчиликдан қутилиш учун мобил телефон орқали яқинлари билан боғланишга муваффақ бўлганлар. Аёлларнинг яқинлари бу ҳақда милицияга хабар берган.
Қирғизистон ва Россия ички ишлар вазирликлари ҳамкорлигида ўтказилган махсус амалиёт чоғида “Февраль” деб аталган тикувчилик цехида юзга яқин киши ишлаётгани, улардан 13 нафари қирғизистонлик экани аниқланган.
-Фирманинг эгаси Россия фуқароси, асосчиси эса вьетнамлик экан. Тикувчиларнинг кўпчилиги Вьетнамдан олиб келинган экан. Бундан ташқари бу ерда Марказий Осиёликлар ҳам ишлаган, - деди Бакит Сейитов.
Айни пайтда цех раҳбариятига нисбатан жиноят иши очилди. Ишчиларнинг иш ҳақларини ундириб бериш масаласи ҳам кўриб чиқилмоқда.