Бишкек шаарынын Биринчи Май райондук ички иштер башкармалыгынын ыкчам кызматкери пара алууга шектелип кармалды. Бул тууралуу Ички иштер министрлигинен кабарлашты.
Билдирүүдө айтылгандай, 16-февралда эки жаран Башкы прокуратурага Биринчи Май райондук милициясынан Урмат деген кызматкердин үстүнөн даттанышкан. Алар милиция кызматкери "кылмыш жоопкерчилигине тартам" деп коркутуп 300 АКШ долларын талап кылып жатканын жазышкан.
Факт боюнча Кылмыш-жаза кодексинин 313-беренесинин 2-бөлүгүнүн 1-пункту (“пара талап кылуу”) жана 305-беренесинин 1-бөлүгү (“кызмат абалынан аша чабуу”) беренелеринин негизинде кылмыш иши козголуп, иликтөө башталган.
Натыйжада 21-февраль күнү кечинде Бишкек шаарында аталган жарандардан 15 миң сом пара алып жаткан жеринен милициянын 29 жаштагы ага лейтенанты кармалды.
Кармалган кызматкер УКМКнын убактылуу кармоочу жайына киргизилди. Тергөө уланууда. (ErN)