Martniñ 1-nden itibaren Kyivden «Kalançak» KÇKN-na qadar demiryolnen barmaq mümkün olacaq – Babin
«Martnıñ 1-nden itibaren bizler «Vadim» stantsiyası ile Hersonğa kelgen Kyiv treni arasındaki şeerlerarası qatnaycaq trenniñ cedvelini uyğunlaştırdıq. Demek, birkişi Kyivden Hersonğa kelgende, şeerlerarası qatnağan trenge bilet alıp, normal platskart vagonlarğa minerek, acele sürette saat 11-ge doğru, «Vadim» stantsiyasına qadar barıp çıqmağa çaresi olacaq. Onen KÇKN-na qadar 10 km. Biz yerli cemaatnen çalışamız. Onıñ içün anda KÇKN ve andan keri qatnağan resmi taksi ve avtobuslar çalışacaq. Bir de aqşam üstü «Vadimden» tren saat 5-te keri qaytacaq», – dep tarif etti o «Küreş» radiosınıñ efirinde.
Ondan da ğayrı Babib Qıqım.Aqiqat Radiosınıñ efirinde, bu yıl yaz aylârına qadar «Ukrzaliznıtsyanen» Kyiv ile «Kalançak» keçiş noqtası arasında tren qatnatılması planlaştırılğanı aqqında da ayttı.
«Ondan da ğayrı, biz «Ukrzaliznıtsyağa» muracaat eterek, trenler «Novoalekseyevkadan» ğayrı, «Kalançak» keçiş noqtasına yedi km mesafede yerleşken «Vadim» stantsiyasına qadar da qatnatilmasını rica ettik. Bular iliştirilgen vagonlar, ya da Kyivden doğru qatnağan tren de olabile. Yazğace bu meseleni çezermiz, dep ümüt etem» - dedi o.
Bundan evel «Kalançak» KÇKN-nıñ serviz bölgesinen beraber abadanlaştırılması içün 55 million grivna kerek olacağı aqqında haber etilgen edi.
Qırım Rusiye tarafından ilhaq etilgen soñ, 2014 senesiniñ Ukrainanıñ qıta qısmınen yarımada arasında memuriy, amma aslında kerçek bir «sıñır» peyda oldı. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışıp başladı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.