Presidenti i Shteteve të Bashkuara, Donald Trump, tha se është “keqinterpretuar plotësisht” nga ata që thonë se ai ka përdorur termin “ndyrësirë” për t’i përshkruar vendet afrikane.
Trump po ashtu tha se akuzat i dëmtojnë përpjekjet për të arritur marrëveshje për të ashtuquajturin program DACA, i cili u jep mbrojtje ligjore imigrantëve të rinj në SHBA.
DACA daton nga koha e ish-presidentit Barack Obama, por administrata Trump ka thënë se do ta shfuqizojë atë.
Ligjvënësve në Kongres u është dhënë kohë deri në mars të vendosin për fatin e rreth 800,000 njerëzve që preken nga programi DACA.
“Marrëveshjet nuk mund të bëhen kur nuk ka besim”, tha presidenti Trump.
Mediat amerikane kanë raportuar se Trump i ka cilësuar vendet në Afrikë dhe Haitin e El Salvadorin si “ndyrësira” në një takim për migrantët në Shtëpinë e Bardhë, më 10 janar.
Senatori demokrat, Dick Durbin, i cili ka qenë i pranishëm në atë takim, ka thënë se Trump e ka përdorur fjalën ndyrësirë disa herë.
Trump ka nxitur kritika gjithandej dhe disa e kanë akuzuar atë për “racizëm”. Presidenti është përgjigjur duke thënë se nuk është racist.
