Aqmescitte «Hizb ut-Tahrir işi» figurantlarınıñ aqrabaları mahkeme qapalı keçkeni sebebinden şikâyetler yazalar
Qırım.Aqiqat muhbiri haber etkenine köre, mahkeme oturişuvı qapalı olacağı aqqında aqrabalarğa mahkeme icracısı haber etken ve bunıñ iç bir inceligi ve sebepleri aqqında aytmağan.
«Mahkeme icracıları qadını bahane köstereler. Bugün oturışuvğa qadın ve balalar olaraq, pek çoq soy-sop kelgen edi. Bu sebepten, er vaqır olğanı kibi, bizler barışıq ve qanuniy yollarnen öz aqlarımıznı qorçalaycaqmız», – dep ikâye ete faal Server Mustafayev.
Muhbirniñ malümatına köre, artıq ellige yaqın şikâyet yazılğan.
Oktâbrniñ 12-nde işğal altındaki Qırımda küç idaresiniñ hadimleri Bağçasaraynıñ altı sakini olğan Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernest Ametovnı tevqif etken edi. FSB olarnı Rusiye ve ilhaq etilgen Qırımda yasaqlanğan «Hizb ut-Tahrir» azaları olğanında qabaatlay.
Dekabr ayında tutulğanlarnıñ apiste qaluv müddeti martnıñ 9-na qadar uzatılğan edi.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.