Ավստրալիայում տասնյակ մարդկանց վրաերթի ենթարկած վարորդը հոգեկան խանգարումներ ունի. ոստիկանություն
Ավստրալական Վիկտորիա նահանգում մեքենայով տասնյակ մարդկանց վրաերթի ենթարկած տղամարդը տառապում է հոգեկան խանգարմամբ։ Այս մասին տեղեկացրել է Վիկտորիա նահանգի ոստիկանության ներկայացուցիչը լրագրողների հետ հանդիպման ժաամանակ, գրում է РИА Новости գործակալությունը:
Հայտնի է, որ մեքենայի վարորդն Ավստրալիայի քաղաքացի է։ 32-ամյա տղամարդը ծնունդով Աֆղանստանից է: Ընդ որում՝ դեռևս չկան հստակ ապացույցներ, որ միջադեպը կապված է ահաբեկչության հետ:
«Մեքենայի մեջ գտնվել է մի մարդ… Երկրորդ տղամարդը գտնվել է դեպքի վայրում, նկատվել է, թե նա ինչպես է տեսաձայնագրում պատահածը բջջային հեռախոսի միջոցով: Բնականաբար, նրան խուզարկել են: Նրա պայուսակի մեջ հայտնաբերվել է 3 դանակ, նրան բերման են ենթարկել ոստիկանություն՝ պարզելու համար՝ արդյո՞ք նա կապ ունի դեպքի հետ», - մանրամասնել է ոստիկանության ներկայացուցիչը՝ նշելով, որ երկրորդ ձերբակալվածը 24 տարեկան է:
Հայտնի է նաև, որ մեքենան, որով իրականացվել է զանգվածային վրաերթը, գողացված չի եղել:
Ինչպես ավելի վաղ հայտնել է Tert.am-ը՝ Ավստրալիայի Մելբուրն քաղաքի կենտրոնում այսօր մեքենան մխրճվել է մարդկանց բազմության մեջ: Վրաերթի ականատեսները մանրամասնել են, որ մեքենան սլացել է մոտ 100 կմ/ժ արագությամբ, մխրճվել մոտ 60 հոգուց բաղկացած ամբոխի մեջ ու բառացիորեն սկսել «հնձել» անցորդներին: Տարբեր աղբյուրներ հայտնում են 14-ից 19 տուժածի մասին, հայտնի է, որ նրանցից ոմանց վիճակը բժիշկները ծանր են գնահատում: