«Նոր Զովք» ընկերությունում հայտնաբերվել են թերի մակնշմամբ և ժամկետանց ապրանքներ. ՍԱՊԾ

Սննդամթերքի անվտանգության պետական ծառայությունը (ՍԱՊԾ) հաղորդում է, որ Երևանի Ազատության 11/76 հասցեում գործող «Նոր Զովք» ՍՊԸ-ում հայտնաբերվել է թերի մակնշմամբ 76 տուփ (փաթեթավորված չրերի տեսականի, տնական հալվա, սառեցված հնդկահավ, կոնֆետների տեսականի), 40 կգ (եփած երշիկներ, ապուխտներ, պանիր Չանախ, քյուֆթա) սննդամթերք և 500 շիշ գազավորված ըմպելիք:


«Տրվել է թերի մակնշմամբ ապրանքների իրացումը կասեցնելու կարգադրագիր: Իրացումը կթույլատրվի միայն մակնշման անհամապատասխանությունները շտկելուց հետո», - ասված է հաղորդագրությունում։


ՍԱՊԾ-ն նաև նշում է, որ տրվել է շուրջ 12 կգ և 3 տուփ պիտանիության ժամկետն անցած եփած երշիկների, խոզապուխտների, խինկալու և թել պանրի իրացումը կասեցնելու կարգադրագիր:


«Ժամկետանց սննդամթերքի ողջ խմբաքանակը տեղում ոչնչացվել է՝ ամբողջականությունը խախտելու միջոցով», - ասված է հաղորդագրությունում: