«Սադի Գոքորը չենք, որ ոնց ուզեք՝ տենց անենք», ԱԺ փոխնախագահի նյարդերը տեղի տվեցին. հայտարարվեց 5-րդ 20 րոպեանոց ընդմիջումը

ԱԺ «Ելք» խմբակցության ղեկավար Նիկոլ Փաշինյանը պահանջեց 5-րդ՝ 20-րոպե ընդմիջումը:

Իսկ մինչ այդ ԱԺ-ն հասցրեց երկու նախագիծ ընդունել, ԱԺ նախագահը դրանից առաջ վարման կարգով ձայն խնդրելու Փաշինյանի հայտարարություն անտեսեց և հայտարարեց, որ հերթական օրինագիծը, ընդ որում՝ քվեարկության դրվեց խնդրահարույց «Դատական օրենսգիրքը երկրորդ ընթերցման և ընդունվեց 64 կողմ քվեարկությամբ:  

Փաշինյանն աղմուկ բարձրացրեց և հայտարարեց. «արձանագրեք, որ երկրորդ ընթերցմամբ էլ օրենքը չի ընդունվել»:

Վարման կարգով խոսեց Վահրամ Բաղդասարյան, քանի որ որոշ կոճակներ չեն աշխատել, պետք է դնել վերաքվեարկության:

Խոսրով Հարությունյանը ևս հորդորեց աշխատել բացառապես կանոնակարգ օրենքով, բայց ինչպես նախկինում, հիմա էլ թույլ տրվի, որ եթե կոճակը չի աշխատել, բայց կողմ է, ձայնը հաշվել:

ՀՀԿ պատգամավոր Սամվել Նիկոյանը շարունակեց. «Եթե հայտարարվում է քվեարկություն չպետք է ընդհատվի»:

Փաշինյանն այս ընթացքում անընդհատ դահլիճում աղմկում էր:

ԱԺ նախագահ Արա Բաբլոյանը խնդրեց «Ելք»–ին թույլ տալ բնականոն ձևով աշխատանքները շարունակել: «Դուք հստակ համոզվեցիք, որ երբ խնդրել եք վարման կարգով ես ձայն տվել եմ, այս անգամ հայտարարեցի քվեարկություն, դուք ասացիք վարման կարգով և խանգարեցիք պատգամավորներին՝ աղմկելով: Վերաքվեարկություն եմ հայտարարում, հետո կտամ ձեզ ձայնի իրավունք»,-ասաց նա:

ԱԺ փոխխոսնակ Էդուարդ Շարմազանովը շտապեցրեց պատգամավորներին վերաքվեարկել» «Քվեարկեք, բոլորդ քվեարկեք, Արթուր քվեարկի, Արման դու էլ քվեարկի»,-հորդորեց ՀՀԿ պատգամավորը: Հայտարարվեց, որ 64 կողմ ձայնով որոշումն ընդունվել է:

Նիկոլ Փաշինյանը հայտարարեց թե օրենքը չի ընդունվել, և պահանջեց վերաքվեարկություն:

Շարմազանովը քվեարկությունից հետո վարման կարգով ձայն խնդրեց և պահանջեց աժիոտաժ չստեղծել: «Ինչքան դուք իրավունք ունեք վարման կարգով, այնքան էլ մենք,  սադի Գոքորը չենք, որ ոնց ուզեք՝ տենց անենք: Ընդունվել է որոշումը, դահլիճում պրովոկացիաներին չտրվել, մանկապարտեզ  է, թե ինչ»,-հունից դուրս եկավ Շարմազանովը:

Քվեարկության դրվեց հաջորդ նախագիծը: Վարման կարգով ձայն խնդրեց Նիկոլ Փաշինյանը և պահանջեց, որ խմբակցությունը 20 րոպե ընդմիջում է պահանջում: Այնուհետև շարունակեց. «Էս ի՞նչ է  կատարվում։ Աժ փոխնախագահը Աժ նախագահի մասին էդ ո՞նց ա խոսում,  սադի Գոքորը չի, էս ինչո՞վ եք ստեղ զբաղված»,-գոռգոռաց պատգամավորը:

Նորից ԱԺ-ում վեճ սկսեց և հայտարարվեց 20 րոպե ընդմիջում: