Ի՞նչ 3 տարի, 13 էլ անցնի, միևնույն է, թոշակը չեն բարձրացնի. թոշակառուները դժգոհ են կառավարությունից
Կառավարությունը թոշակառուներին լավ չի վերաբերվում, եթե Հայաստանում մարդը մեծանում է, կարող է հանգիստ մեռնել: Tert.am-ի հարցման ընթացքում նման կարծիք հայտնեց թոշակառուներից մեկը:
«Պետք է աշխատենք հոսանքը, գազը ավելի քիչ օգտագործել, իսկ մնացած հարցերում՝ սննդի գնաճ է և այլն, պետք է յոլլա գնանք: Իհարկե, դժգոհ եմ այս վիճակից, բայց որ դժգոհեցի, ո՞վ է բանի տեղ դնելու: Ինչի՞ համար գնամ ավելորդ ճղեմ ինձ, այդքան առողջություն ունե՞մ»,- ասաց թոշակառուն:
Հիշեցնենք, որ 2018թ. պետական բյուջեով չի նախատեսվում կենսաթոշակի չափը բարձրացնել: Բացի այս, ֆինանսների նախարար Վարդան Արամյանը հայտարարել է, որ առաջիկա 3 տարիներին ևս աշխատավարձերի և թոշակների բարձրացում չի լինելու՝ հաշվի առնելով պետության հնարավորությունները:
«Ի՞նչ 3 տարի, 13 էլ անցնի, միևնույն է, թոշակը չեն բարձրացնի: Ամեն ինչ թանկանում է, բայց դրան զուգահեռ թոշակը չի բարձրանում»,- նշեց մեկ այլ թոշակառու:
Թոշակների ցածր լինելուց և ապրանքների պարբերաբար թանկացումներից բացի առաջիկա ամիսներին ավելանալու են նաև կոմունալ վճարները: Օրինակ՝ թոշակառուներից մեկը հայտնեց, որ ձմռան ամիսներին իր կոմունալ վճարները 40 հազարի են հասնում, իսկ իր թոշակը 44 հազար դրամ է. «Մենակ գազը արդեն ամբողջ թոշակը վերցնում է: Հացի գումարը տալիս ենք, որ գազի, հոսանքի պարտք չունենանք»:
«Ես թոշակառու եմ, բայց ապահով եմ, երեխաներս են ինձ օգնում: Եթե երեխաներս չլինեին, իմ թոշակով միայն իմ շաքարային դիաբետի դեղերին չէր հերիքի: Եթե թոշակառուն մենակ եղավ, ապա նա չի կարող ապրել»,- ասաց մեկ ուրիշը:
Մանրամասները՝ տեսանյութում: