Անդրիաս Ղուկասյանի գործով վկան քարեր նետելու հրահանգից բացի այլ բան չի հիշում
Դատարանում նա ասաց, որ Ղուկասյանին ճանաչում է հանրահավաքներից, որպես կազամակերպիչ, պնդելով, որ լսել է, թե ինչպես է նա հրահանգ տվել ցույցի մասնակիցներին՝ քարեր հավաքել և նետել ոստիկանների ուղղությամբ: Ողջ հարցաքննության ընթացքում, սակայն, վկա Պապիկյանը հիմնականում խոսում էր միայն այդ դրվագի մասին: Մնացած բոլոր հարցերին, մասնավորապես, հարցին՝ որտե՞ղ են այդ պահին գտնվել լրագրողները, և հնարավո՞ր է նրա ցուցմունքներն ապացուցել տեսագրությունների միջոցով, Պապիկյանը պատասխանում էր՝ ոչինչ չի հիշում, միայն հստակ կարող է ասել, որ անձամբ լսել է, թե ինչպես է Ղուկասյանը քարեր նետելու հրահանգ տվել:
Նա նշեց նաև [«Ժառանգության» փոխնախագահ] Արմեն Մարտիրոսյանի, Դավիթ Սանասարյանի անունները, ընդգծելով, թե, մասնավորապես, Մարտիրոսյանից նույնպես նման կոչեր է լսել: Հարցին ի պատասխան՝ անձամբ տեսե՞լ է, թե ինչպես է հենց Ղուկասյանը քարեր նետում ոստիկանների ուղղությամբ, Պապիկյանը նախ ասաց, թե տեսել է, սակայն ճշտող հարցին ի պատասխան, նշեց՝ Ղուկասյանը պարզապես հրահանգել է:
Վկան շարունակ պնդում էր, թե Անդրիաս Ղուկասյանը փորձ է արել մտնել ՊՊԾ գնդի տարածք, սակայն այդպես էլ չհստակեցրեց, թե ինչպես է վերջինս փորձել կատարել այդ գործողությունը: Ղուկասյանի հարցին՝ վկան տեղյա՞կ է, թե որն է եղել հուլիսի 17-ից հետ տեղի ունեցած հանրահավաքների նպատակը, Պապիկյանը պատասխանեց՝ ՊՊԾ գնդի տարածքը գրավածներին միանալը: Սակայն հարցին՝ բոլո՞րն են ցանկացել գնալ ՊՊԾ գնդի տարածք, վկան պատասխանեց՝ չի կարող հստակ ասել: Էդգար Պապիկյանն այսօր նաև հիշատակեց Զարուհի Փոստանջյանի անունը, պնդելով, թե Փոստանջյանը հուլիսի 29-ին կայացած բողոքի ցույցի ժամանակ ասել է՝ եթե ոստիկաններն առաջ գան, ապա նրանց քարերով կհարվածեն:
Այսօրվա դատական նիստի մեկնարկին պաշտպանական կողմը հանդես եկավ հայտարարությամբ՝ դատավոր Վարդան Գրիգորյանին խնդրելով ինքնաբացարկի դիմում ներկայացնել, քանի որ, ըստ պաշտպանական կողմի, դատավորի գործողություններն անօրինական են և նա վատ վերաբերմունք է ցուցաբերում ամբաստանյալի նկատմամբ: