Җаваплар түбәндәгечә булды:
Марат Гаффаров, муниципаль район башкарма комитеты җитәкчесе:
–Мин республика җитәкчелеге үткәргән сәясәтне тулысынча хуплыйм. Киләчәккә һәрвакыт зур өметләр һәм ышаныч белән карыйм. Район башлыгыбыз Илхам Валеев җитәкчелегендә тирә-юнь районнарны сокландырырлык эшләр башкаруыбызга сөенәм. Яңа елда да безне зур эшләр көтә. Республика һәм илкүләм программаларның барысында да актив катнашуыбыз күп нәрсәне дәлилли. Инде бу ел ахырында ук район үзәгендә 80 урынга исәпләнгән балалар бакчасы һәм заманча олы мәдәният йртына нигез салынды. Әлеге проектларны үз вакытында тормышка ашырырбыз дип уйлыйм. Илебездә кабатланып торган икътисади кыенлыкларга карамастан, районыбызның социаль үсеш планы да уңышлы үтәлер дип ышанам.
Якынлашып килүче Яңа елда җир йөзендә тынычлык, һәр йортта иминлек, муллык булсын иде. Яшь гаиләләрнең артып торуын, йортлардан балаларның шатлыклы авазлары бер вакытта тынмавын телим.
Каюм Сафин, Бөек Ватан сугышы ветераны, Күки авылы.
–Иң элек мин районбызда булган барлык сугыш ветераннарына олы Җиңү көненә кадәр сау-сәламәт булуларын тыныч, матур, мул тормышта яшәүләрен теләр идем. Районыбыз халкы элеккегечә үз ара дус, тату гомер кичерсеннәр. Без өлкән буын вәкилләре тарафыннан миллионлаган корбаннар хисабына саклап калынган ватаныбызның чәчәк атуын һәм дөньяда иң бәхетле ил булуын телим. Районыбызда хезмәт сөючән халык яши. Алдагы елларда да матур, тотрыклы, яхшы тормышта яшәсәк иде.
Үзбәк Мусин, “Татарстан Республикасының атказанган механизаторы”:
–Һәркем Яңа елга иң матур уй-теләкләр белән аяк баса. Узган ел ул күпләребез өчен дә ул уңышлы булды. Сөенечләр безнең гаиләне дә читләтеп үтмәде. Ел башында кызым Дилбәр Идел буе Федераль округында спортның кул көрәштерү төре буенча чемпион калды. Ә үзем трактор штурвалы артына утырып эшләвемә 45 ел тулуын билгеләп үттем. Яз башында табигать торышы бер кадәр куркытса да, уңышлар көтелгәннән дә куанычлы булды. Безнең Яңа Арыш авылы кешеләре бик эшчән, хезмәт сөючән бит. Шуңа якынлашып килүче бу 2015 нче “кәҗә” елының да уңышлы, сөенечле вакыйгаларга мул булуын теләр идем.
Виталий Волков, пенсиядәге хирург, районның мактаулы гражданины.
– Минемчә, кешегә иң кадерлесе сау-сәламәт булуыдыр. Саулык–зур бәхет дип, хак әйтә халык. Аның өчен һәркем үзен кайгыртырга, спорт белән шөгыльләнергә, шәхси сәламәтлек процедурасы булдырырга тиеш дип саныйм. Сәламәт яшәү рәвеше һәр гаиләгә үтеп керсен иде. Бигрәк тә яшь буын вәкилләре, мәктәп укытучылары тәмәке тарту, эчкечелек кебек яман гадәтләр белән мавыкмасын. Киләсе Яңа ел һәр гаиләгә зур бәхет, саулык, иминлек алып килсен иде.
Җавапларны Идрис Аметов язып алды.
Фото:
Фото редакция архивыннан алынды.