ЭНЪ ИЙГИ ПАРК
Карашай-Шеркеш Республикасынынъ «Ясыл арал» маданият эм тыншаюв паркы «Хрустальное колесо» конкурсында йылына бир миллионнан артык аьдем йоклаган СНГ юртларынынъ эм Россиядынъ ашык юбанув паркларынынъ арасында биринши орынды алды.
Он доьртинши кере озгарылган Россиядынъ парклар тармагынынъ кеспилик сынъар «Хрустальное колесо – 2016» конкурсынынъ тамамлары Сочи каласында, юбанув эм тыншаюв индустриясынынъ усталарынынъ форумында, 30 сентябрьде белгилендилер. Конкурстынъ уйгынлавшысы – «САПИР» юбанув индустриясынынъ партнерлар эм ассоциациялар Союзы. Бас баргы уьшин туьрли номинацияларда юртымыздынъ энъ де ийги парклары сынастылар.
Конкурстынъ савгалав амалламасында енъуьвши парктынъ басшылыгына диплом эм конкурстынъ белгиси – кол ман этилген хрусталь статуэткасын савгаладылар. 2016 йылда Россиядынъ эм СНГ юртларынынъ энъ ийги юбанув паркы орынласкан Черкесск каласынынъ басшылыгына Разылык хатлар йиберилдилер.
«Ясыл арал» паркымызды Черкесск каласынынъ яшавшыларынынъ эм конакларынынъ энъ де суьйикли ери этер уьшин, коьп куьшимизди салганмыз. «Хрустальное колесо» конкурсында парк баьри оьлшемлери бойынша жюридинъ йогары белгилерине тийисли этилип, енъуьвши болды», – деди «Ясыл арал» маданият эм тыншаюв паркынынъ директорынынъ орынбасары Науруз Байрамуков.