Эки уллу кёпюрге къараллыкъды
Къарачай-Черкесияда эки кёпюрге ремонт этиб башлагъандыла.
Аланы бири Уллу Ставрополь каналны юсю бла баргъан кёпюрдю, ол «Лермонтов-Черкесск-Ударный» джолда 14,4 километр узакълыкъдады, экинчиси «Черкесск-Исправная-Сторожевая» деген джолда Гитче Зеленчук сууну юсю бла баргъан кёпюрдю.
Бу эки кёпюрню юсю бла 2016-чы джыл сентябрны 9-дан 2017-чи джыл апрелни 1-не дери не тюрлю да улоу джюрюрюк тюлдю. Уллу Ставрополь каналны юсю бла баргъан джол 1963-чю джыл ишленнгенди, устала тинтиб къарагъандан сора, аны джараусуз эмда къоркъуулу болгъанын ачыкълагъандыла.
Кёпюрню эки джанында эмда ортасында дагъанланы ауушдургъандан сора кёпюрню юсюн толусу бла джангыртырыкъдыла, тёгерегин бегитирикдиле, аны не джаны бла да деменгили этер джанындан кюреширикдиле.
Гитче Зеленчук сууну юсю бла баргъан кёпюр «Черкесск-Исправная-Сторожевая» джолда 382 метр узакълыкъда орналгъанды, ол 1975-чи джыл ишленнгенди. Аны зиянлары да тинтилиб къаралгъанында белгили болгъандыла. Анга да тамамлы ремонт этилликди.