Сакъат сабийлеге гимназия ачылгъанды
Быйыл сентябрны 1-не Черкесскеде сакъат сабийлеге аталгъан 840 орну болгъан гимназия ачыллыкъды.
- 19-чу номерли гимназияны, пандусла, лифт да салыб, кеслери джюрюялмагъан сабийле керекли этажлагъа чыгъарча джарашдыргъанбыз, - деб хапар айтханды Черкесск шахарны мэри Руслан Тамбиев. Ол айтханнга кёре, «Доступная среда» деген программаны джашауда орунлу этиу бла байламлыды бу учреждениени ачылгъаны, ол себебден хар не да сакъат сабийлеге джараулу этилгенди. Мекямны уллулугъу 5,5 минг квадрат метрди, ол юч этаждан къуралгъанды. Былайда окъуу-билим алгъандан сора да тюрлю-тюрлю кёрмючле, творчество экспозицияла да бардырыргъа боллукъду. Школну уллу эмда гитче спорт заллары да болгъанларын чертерге тыйыншлыды. Аны бла бирге джюзерге бассейни, футбол тюзю эмда спортну кёб тюрлюсю бла кюреширге мадар берген майданы да бардыла.
Джангы гимназияда сахнасы, гримёр бёлюмю да болгъан 570 адам сыйыннган кенг, джарыкъ акт зал, библиотека, окъуу зал, 300 адамгъа орну болгъан ауузланыучу зал да болгъанлары къууандырады. Аны бла да къалмай, Черкесск шахарны 18 школуну кирген джерлери сакъатлагъа джараулу джарашдырылгъандыла, 5 школда да сакъатла джюрюб, билим алырча таблыкъла къуралгъандыла.