Михаил Ефремов быел ук Яңа елга төрмәдән чыгарга җыена
Михаил Еремов Яңа елны гаиләсе белән билгеләп үтәчәк. Актерның үпкә авыруы җитди кискенләшкән, аны шуңа күрә колониядән шартлы рәвештә вакытыннан алда (УДО) азат итәчәкләр. Барлык медицина белешмәләре җыелган инде.
«SHOT» телеграм-каналы ачыклаганча, хәзер актер Белгород колониясендә, аны ялкынсынуга каршы дарулар, иммунодепрессантлар һәм ингаляцион бронходилататорлар белән дәвалыйлар. Төзәтү колониясендәге 1 нче медчастьта дарулар белән проблемалар юк. Моннан тыш, туганнары һәм адвокатлар тоткынга, табиб белән алдан килештереп, дарулар тапшыра. Аның якыннары сүзләренчә, Ефремовка КТ кирәк — моның өчен аны дәүләт клиникасына алып чыгарга мөмкиннәр.
Тулаем алганда хәзер актерның хәле канәгатьләнерлек дип бәяләнә, ләкин Ефремов сулыш алу кыенлыкларыннан зарлана һәм аңа сөйләшергә кыен, ди.
Элегрәк матбугат Михаил Еремовта хроник обструктив үпкә авыруы кискенләшүен язган иде. Мәскәү Иҗтимагый күзәтү комиссиясе (ОНК) сәркатибе Алексей Мельников телеграм-каналга белдергәнчә, бу чыннан да бик җитди авыру, ул «УДО буенча азат ителүгә тиешле шарт» була ала, чөнки мондый тоткыннар сулыш алу белән проблемалар кичерә һәм хәтта караваттан торганда да буыла.
Хәзер Ефремовның сулыш алу җитешсезлеге яки үпкә инфекциясе үсеше куркынычы бар, шуңа күрә аның адвокатлары, актер гаиләсенә декабрьдә кайта һәм клиникада комплекслы тикшеренү уза алсын өчен, якын арада УДО турында гариза бирәчәк.
Михаил Ефремов сентябрь аенда танкист булып хәрби операциягә дә китәргә теләгән иде. Ул махсус операция зонасына җибәрүләрен сорап, гариза да бирергә җыенды. Ул вакытта якыннары һәм колония җитәкчелеге аны кире уйларга күндергән. Ефремовка колониядә иҗади үсәргә, тегү цехында эшләргә тәкъдим иткәннәр. Соңрак Ефремовны китапханәгә эшкә күчергәннәр, анда ул китаплар биреп торган, шигырьләр язган. 2020 елның 8 июнендә Михаил Еремов Мәскәүдә авариягә эләкте. Аның автомобиле фургонга бәрелде, фургон йөртүчесе алган җәрәхәтләрдән хастаханәдә үлде. Экспертиза күрсәткәнчә, актер машина белән исерек килеш идарә иткән. 2020 елның сентябрендә суд Ефремовны сигез ел колониягә хөкем иткән иде. Октябрьдә срок 7,5 ел итеп калдырылды.