Алтай мөфтие мөселман кардәшләрен коронавирустан сакланырга өнди
(Казан, 22 июнь, «Татар-информ»). Алтай Республикасы мөселманнары Диния нәзарәте мөфтие Жанболат Охтаубаев Алтайның Кош-Агач районында коронавирус таралу сәбәпле, видеомөрәҗәгать белән чыкты. Бу хакта «Новости Горного Алтая» басмасы хәбәр итә.
Соңгы мәгълүматлар буенча, биредә 241 авыру теркәлгән, бу сан — Алтай Республикасындагы вирус йоктыру очракларының (466 очрак) яртысыннан күбрәк, диелә бу хәбәрдә.
«Хөрмәтле мөселман кардәшләр! Сакланыйк, карантин режимын үтик», — ди мөфти. Ул хәдисләр сөйли, барча халыкны үзләрен сакларга өнди.
Мөфтинең мөрәҗәгатен үзенең Инстаграм аккаунтында район башлыгы Серикжан Кыдырбаев урнаштырган.
«Алтай Республикасының баш мөфтие Covid19 белән бәйле вазгыять аркасында бик борчыла. Шуңа күрә якташлардан үзизоляция һәм карантин режимын үтәүне, бигрәк тә туйларда һәм кеше җирләгәндә битлек киюне, дистанцияне төгәл саклауны сорап видеомөрәҗәгать әзерләде. Хәзер сакланырга, үз сәламәтлегеңне кайгыртырга гына түгел, ә туганнарыңны һәм якыннарыңны да сакларга кирәк», — дип язган Кыдырбаев.