Татарстан фотографы күргәзмәсе «Мосфильм»да: «Ясалма интеллект гасыры килеп җитте»
1 август көнне ТР Фотографлар берлеге әгъзасы - ватандашлары өчен җан атып, игелекле гомер йомгагын сүткән Сергей Волковның «Мосфильмдагы галереядә» зур күргәзмәсе ачылды. Биредә безнең журналистыбыз, ТР Фотографлар берлеге вәкиле Юлай Низаев та булып кайтты.
Әйтергә кирәк, күргәзмә авторы ТР Фотографлар берлеге вәкилләре өчен башкалага эшлекле сәфәрне бушлай оештырды. Комфорт белән бик яхшы автобуста бардык, даһи шәхесләребез яшәгән «Мосфильм» кунакханәсендә тукталдык. Моның өчен язма башында ук мәрхәмәтле хәйриячегә чын күңелдән рәхмәт сүзләрен җиткерәсем килә. Ни дисәң дә, әле Татарстанның башка иҗат әһелләре тупланган берлекләрдә андый олы җанлы шәхесләр бар микән соң ул?! Һичшиксез, Сергей Алексеевич – күпләргә үрнәк булырлык бит!
- «ТР Фотографлар берлеге» төбәк иҗтимагый оешмасы – республикада фотосәнгатьне үстерүгә юнәлдерелгән, уртак мәнфәгатьләрне яклау, устав максатларына һәм бурычларына ирешү өчен, фотосурәтләрнең төрле өлкәләрендәге фотографларны, иҗади хезмәткәрләрне һәм белгечләрне берләштерүче иҗат берлеге. 2023 елның декабренә кадәр берлекне хезмәттәшебез, «Татар-информ» агентлыгында мактаулы хезмәт куйган фотограф Рамил Гали җитәкләде.
100 еллык «Мосфильм»ны күрүләрне дә насыйп итте иҗатташыбыз!
Эшлекле сәфәргә без 1 август көнне илебез башкаласы Мәскәүгә килеп җиттек. Бик матур күренеш: фотографларга берлек әгъзасы, танылган фоторәссам Сергей Волков «Мосфильм»га экскурсия бүләк итте.
«Әлбәттә, «Мосфильм»ны, аның музейларын, кинолар төшерелә торган павильоннарны тамаша кылгач – тәэсирләр бер зур диңгез төсле. Моңарчы мин бу урын турында кинолар хакында интернеттагы, «Культура» телеканалындагы документаль фильмнар аша гына белә идем. Әлеге экскурсия – балачак, матур хыяллар белән очрашу. Мин бик шатландым, монда күпме тарихи мәгълүмат тупланган», – дип сөйләде театр сәнгате әһеле, нәфис сүз остасы Розалия Зәкиева.
«Кайчандыр зәңгәр экраннардан без бик нык яратып караган совет чоры актерлары турында, алар башкарган рольләр хакында бихисап күргәзмәләр күрү насыйп булды. Мин үзем актриса буларак та, ул дәвер артистларының һөнәри осталыгына сокланам. Нәкъ менә аларның эшчәнлеге тәҗрибәсендә хәзерге буын театраль бүлек студентларын укытырга кирәк», – диде ул.
Быел «Мосфильм» 30 гыйнварда үзенең 100 еллыгын билгеләгән. Шуңа күрә дә экскурсия барышында күрсәтелгән тәүге зал «Мосфильм»ның алтын гасыры» дип атала. Биредә киноконцерн ачылганнан 3 меңнән артык фильм төшерелгән. Әлеге вакытта биредә фильмнар гына түгел, ә сериаллар, тапшырулар, телевизион проектлар да төшерелә. Шулай ук кастинглар да үткәрелә. Гомумән, монда 17 павильон, 2 ачык һавадагы мәйданчык һәм 23 бүлекчә эшли. «Мосфильм»ның тулаем мәйданы 30 гектар тәшкил итә.
Экскурсия барышында элекккеге чорларда артистларга ничек грим салулары турында, Россия кинематографиясенең классика, алтын фондына кергән киноларның ничек төшерелүе хакында да сөйлиләр. Татарстан Фотографлар берлеге вәкилләренең биредә кинолардагы реквизитларны, автомобильләрне күрү мөмкинлеге булды. Шулай ук бүгенгесе көнне киң билгеле «Синяя птица» музыкаль тапшырулары төшерелгән павильоннарны да карадык.
«Мосфильм»да күргәзмә ачылу – ул авторның талантын Бөтенроссия дәрәҗәсендә тану»
Кич белән исә ТР Фотографлар берлеге вәкилләре фотограф, эшмәкәр Сергей Волковның Мәскәүдә «Мосфильмдагы галереядә» ачылган «50×50» күргәзмәсе белән танышты. Күргәзмә ифрат дәрәҗәдә заманча, нейрочелтәрләр, ясалма интеллект ярдәмендә ясалган.
Экспозиция авторы Сергей Волков – гаҗәеп күпкырлы, кешелекле һәм кечелекле шәхес. Татарстан Республикасы Фотографлар берлеге әгъзасы, күп кенә коллектив һәм шәхси фотокүргәзмәләрдә, Татарстан Республикасы Милли музеенда ел саен уздырыла торган «АртГалерея» һәм «Төрле төстәге Казан» күргәзмәләрендә катнаша. Татарстан Республикасы фотографлар берлегенең еллык хисап күргәзмәләрендә бик актив катнашып килә. Шул ук вакытта фоторәссам берничә предприятиегә, шул исәптән «ГОС» (Сколково) компаниясенә нигез салучы һәм җитәкчесе.
Ачылыш тантанасында ТР Фотографлар берлеге рәисе Виктория Шиһапова Сергей Волковка берлекнең Рәхмәт хатын тапшырды. Әлеге бүләк Сергей Волковка Союз үсешенә керткән лаеклы өлеше, һәрьяклап ярдәм өчен бирелде.
«Безнең өчен Сергей Алексеевичның «50х50» күргәзмәсе – мөһим вакыйга. Башкалада, «Мосфильм»да ачылу – ул авторның талантын Бөтенроссия дәрәҗәсендә тану. Шулай ук ТР Фотографлар Берлеге өчен бу Татарстанны, республикабызны, безнең талантларны киң аудиториягә тәкъдим итү һәм яңа элемтәләр һәм илһам алу мөмкинлеге», – дип сөйләде Татарстан Фотографлар берлеге рәисе Виктория Шиһапова.
Шулай ук берлек вәкилләре белән һәрчак актив булуын ассызыклады, Сергей Волковның Татарстан өчен әһәмиятен әйтте. «ТР Фотографлар Берлеге үз әгъзаларына күргәзмәләр һәм чаралар оештыруда һәрвакыт ярдәм итә. Сергей Волков үзе күп еллар дәвамында Союз үсешенә зур өлеш кертте. Һәм хәзер аның күргәзмәсен ачуда катнашу безнең өчен зур мәртәбә!» – диде ул.
«Әлеге күргәзмәдә Казаннан килеп катнаша алу – безнең өчен зур дәрәҗә. Шушы мөмкинлек өчен, фотосәнгатьтә шулкадәр актуаль, көнүзәк темаларны күтәргәнегез өчен зур рәхмәт! Ясалма интеллект ярдәмендә булдырылган күргәзмә оештыруда да сез беренчеләрдән», – диде берлек вәкиле Кристина Дегтярева.
Күргәзмәне караучылар авторның эшләре ясалма интеллект ярдәмендә ясалган булуга карамастан, аларда аның дөнья күренешләрен күзаллавы, җанлы хисләр булуын билгеләде. Галереянең төп залында – «Kandinsky 3.0» кебек нейрочелтәрләрнең ясалма интеллекты белән авторлыкта булдырылган Сергей Алексеевичның алты дистәгә якын картинасы («арт») тәкъдим ителде.
«Ясалма интеллект гасыры килеп җитте»
Күргәзмә авторы ассызыклап үтүенчә, ясалма интеллект хәзерге заманда яшәешкә ныклы адымнар белән кереп бара.
«Бу күргәзмәне оештыру, үткәрү максаты – нейрочелтәрләр ярдәмендә ясалган сурәтләрне галереяләрдә халыкка күрсәтү, чөнки экспозицияләр үзенә күрә бер атмосфера бирә. Әйтергә кирәк, ясалма интеллект гасыры килеп җитте, без аның чорында яшибез, дип хаклы рәвештә әйтә алабыз», – дип бәян итте миңа Сергей әфәнде.
«Әлбәттә, бик күп сүзләр йөри, ясалма интеллект кешене алмаштыра алмый. Мондагы күргәзмәне мин төрле серияләргә бүлдем, мәсәлән, менә ел фасыллары календаре килеп чыкты. Ясалма акыл, әлбәттә, кешенең бөтен хисләрен күрсәтә алмый, әмма аның үзенчәлеге һәм киләчәге бар. Фэнтези да бу замана юнәлешендә зур роль уйный. Шулай ук күргәзмәмне хатын-кызларның кызыклы, матур образлары тулыландыра», – дип ассызыкллап узды ул әңгәмәбез барышында.
Күргәзмәнең ачылу тантанасы вактытында Россия тынычлык фонды вәкиле Галина Медведева Волковка «Россия профессионалы» дигән истәлек билгесен тапшырды.
«Сергей Алексеевич – бүгенге көннең мөмкинлекләрен дә, киләчәкне дә күзаллый ала торган фоторәссам. Әлбәттә, ул – шаккатмалы, искиткеч шәхес. Ул – яңа мөмкинлекләргә ачык кеше. Хәзер төрледән-төрле ясалма интеллектны куллану ысуллары популярлаша бара. Без кешенең һәм ясалма интеллектның уртак иҗат җимешләрен күрәбез. Бу күргәзмәдән соң, ясалма интеллект белән кешелек хакында уйларыбыз, күптөрле фикерләребез барлыкка килергә тиеш», – диде «ПроЛаб» үзәге идарәсе рәисе Николай Канавин.
Кунаклар арасында лотерея уены да узды, аның җиңүчесе нейрочелтәр ярдәмендә үз картинасын булдыру һәм аны кич азагында инде бастырылган килеш күрү мөмкинлеге алды.
Алдан ук оештыручылар вәгъдә итүләренчә, күргәзмә шактый уникаль иде, ифрат заманча булуы белән дә игътибарыбызны җәлеп итте. Барлык кунаклар исә Сергей Душковның авторлык кухнясы сыйларыннан да авыз итә алды.
Сергей Волковның күргәзмәдә тәкъдим иткән фотолары: нейрочелтәрләр ярдәмендә ясалган сурәтләр
Фото: Ясалма фәһем нигезендә булдырылган календарь айлары сурәтләнеше
Фото: Кышкы айларның сурәтләнеше. «Календарь» сериясеннән
Фото: © Кышкы айларның сурәтләнеше. «Календарь» сериясеннән
Фото: «20 гүзәл хатын-кыз образы» сериясе
Фото: «20 гүзәл хатын-кыз образы»
Фото: «20 гүзәл хатын-кыз образы» сериясенең дәвамын күрәсез
Фото: «Парящие замки» фэнтэзи сериясен күрәбез