Айталина Ильина аатынан оҕо тыйаатырдарын бэстибээлэ түмүктэннэ

Матрена уонна Алексей Павловтар салайыыларынан үлэлиир Судаарыстыбаннай Үүнэр көлүөнэ тыйаатыра кулун тутар 20-гэр бэлиэтэнэр Аан дойдутааҕы оҕо уонна ыччат тыйаатырын күнүгэр Айталина Ильина аатынан «Күн бытархайа» күрэс-бэстибээли түмүктээтэ.

Тыйаатыр олоҕор ураты суолу хаалларбыт чаҕылхай артыыс аатын сүгэр, Дьокуускай куорат уонна куорат эргинин уһуйааннарын уонна оскуолаларын хабар улахан тэрээһин быйыл XI-c төгүлүн ыытылынна. Манна 25 айар кэлэктиип уонна 400-тэн тахса эдэр артыыс кытыннылар. СӨ үтүөлээх артыыһа Валентина Якимец бэрэссэдээтэллээх дьүүл сүбэтэ олунньу 28 күнүттэн саҕалаан кулун тутар 19 күнүгэр диэри  туруоруулары көрдүлэр уонна үс бөлөххө арааран сыаналаатылар.

Дьүүл сүбэтигэр киирдилэр: «Күн бытархайа» күрэс-бэстибээл бырайыагын ааптара, РФ култууратын үтүөлээх үлэһитэ, СӨ норуодунай артыыһа, тыйаатыр уус-уран салайааччыта Алексей Павлов,  Үүнэр көлүөнэ тыйаатырын төрүттээччитэ, РФ култууратын үтүөлээх үлэһитэ Матрена Павлова,  тыйаатыр сүрүн режиссера, СӨ ускуустубатын үтүөлээх диэйэтэлэ Александр Титигиров,  тыйаатыр сүрүн худуоһунньуга, СӨ култууратын туйгуна Прасковья Павлова, СӨ үтүөлээх артыыһа Мария Данилова, СӨ үтүөлээх артыыһа Марина Корнилова, СӨ култууратын туйгуна, тыйаатыр артыыһа Георгий Бессонов,  тыйаатыр артыыһа Анастасия Петрова,  тыйаатыр артыыһа Мичил Хомподоев, тыйаатыр артыыһа Айталыына Яковлева.

Дьүүл сүбэтин сыралаах үлэтин түмүгэр кыайыылаахтар ааттаннылар. Кинилэр Айталина Ильина дьиэ кэргэнин, аймахтарын уонна доҕотторун, ону сэргэ Үүнэр көлүөнэ тыйаатырын артыыстарын анал бириистэрин тутан  үөрдүлэр-көттүлэр. Дьэ, кимнээх кыайыылаах буоллулар?

III-с истиэпэннээх лауреат аатын ыллылар:

• «Семицветик» уһуйаан, «Муха-Цокотуха»
• Хатас орто оскуолата, «Дети войны» 
• 26 №-дээх оскуола, «Семейные ценности»

II-с истиэпэннээх лауреат аатын ыллылар:

• «Родничок» уһуйаан, «Кэҕэ»
• 6 №-дээх оскуола, «Семь братьев и девушка Дружба»
• 18 №-дээх оскуола, «Священный Ильмень»

I-кы истиэпэннээх лауреат аатын ыллылар:

• «Кэскил» уһуйаан, «Биэс ынахтаах Бэйбэрикээн Эмээхсин»
• 7 №-дээх оскуола «Кэскил» айар кэлэктиибэ, «Дорбоон Уол уонна Торолуйа Боотур»
• 13 №-дээх оскуола «М.И.Р» тыйаатыра, «Холодное дыхание войны»

«Режиссер бастыҥ үлэтин иһин» анал бириистэргэ тигистилэр:

• Вера Никитична Старкова («Кэрэчээнэ» уһуйаан, Хатас)
• Дария Михайловна Муксунова (Саха гимназията)
• Агафья Семёновна Молонова (13 №-дээх оскуола)

Бэстибээл сүрүн «Гран-при» бирииһигэр тигистилэр:                                                                       

• «Кэрэчээнэ» уһуйаан— спектакль «Кыһыҥҥы остуоруйа»
• Саха гимназията, «Харама Боотур уонна Амма Куо»
• 39 №-дээх оскуола, «Щелкунчик»

Бэстибээлгэ үгэс быһыытынан Айталина Ильина ийэтэ Татьяна Громова кэлэн кытынна. Кини бэйэтэ, аймахтара уонна Хаҥалас улууһун Ой сэлиэнньэтин Эркээни түөлбэтин олохтоохторо анаабыт сыаналаах бириистэрин туттарда.

«Үүнэр көлүөнэ тыйаатырын кэлэктиибигэр «Күн бытархайа» бэстибээлгэ тапталлаах оҕом Айталина Ильина аатын иҥэрэн сыл ахсын көтүппэккэ тэрийэн ыытаргыт, оҕо аймах үтүөҕэ-сырдыкка тардыһарын туһугар ис сүрэхтэн кыһаллан үлэлииргит иһин махтанабын. Айталина тыйаатырын олус күүскэ таптыыра, эһиги эмиэ кинини умнубаккыт», — диэн Татьяна Егоровна тэрээһини долгуйа түмүктээтэ.

Бэстибээл хаартыскаларын манна киирэн көрүөххэ сөп: https://vk.ru/album-215951810_310422881

Сырдык уонна хараҥа тэҥнэһэригэр сиэр-туом буолла

Сообщение Айталина Ильина аатынан оҕо тыйаатырдарын бэстибээлэ түмүктэннэ появились сначала на SAKHALIFE.RU - Новости Якутии и мира.