Волга дарёсида камида ўн одам сувга чўкиб кетди
ТАССнинг билдиришича, воқеа Волгоград шаҳрида 11 июнь куни юз берган. 16 кишини олиб кетаётган катамаран баржага урилгани оқибатида одамлар сувга чўккан.
Қутқарувчилар 5 одамни қутқариб қолган. Дастлаб 9 одамнинг, кейинроқ эса яна бир шахснинг жасади топилган. Сувга чўкиб ўлганларнинг 6 нафари аёл экани айтилмоқда.
Расмийларнинг билдиришича, тўқнашувга катамаран бошқарувчиси навигация талабларига амал қилмагани сабаб бўлгани тахмин қилинмоқда.
Хабарда айтилишича, катамаран бошқарувчиси тегишли рухсат қоғозларига ва катамаранни бошқариш ҳуқуқига эга бўлмаган.