Умрингиз давомида ҳеч лотереялар ўйнаб кўрганмисиз. Ҳеч бўлмаса бобонгиз ёки бувингизни пенсияси келганида ёнига лотерея ҳам қўшиб берган тўғрими? Бундан кексаларнинг жаҳли ҳам чиқиб қолган пайтлари бўлган. Чунки ҳар пенсия келганида лотереяларни мажбуран беришарди. Ютуқ чиқса майлику-я, аммо куйиб қолса аттанг, деб қолиши ҳеч гап эмас. Энди буларга чек қўйилди.Бугунги кунда “Ҳалқ банки” томонидан бир неча турдаги лотереялари ташкил этилиб, ўтказиб келинмоқда. Лекин айрим ҳолатларда мижозларга банк хизматлари кўрсатиш жараёнида пенсия ва нафақаларга лотерея билетлари қўшиб берилиши ҳолатлари қайд этилган. Таъкидлаш жоиз, лотерея билетларини иш ҳақлари, пенсия ва нафақалар, бошқа биринчи даражали тўловларга қўшиб сотиш қатъиян тақиқланган. Бу бўйича қуйи филиалларга Ҳалқ банки бошқарувининг алоҳида кўрсатмаси берилган. Фуқаролардан келиб тушаётган мурожаатлар ва шикоятларда кўтарилган масалалар атрофлича таҳлил қилиниб, қонунбузарликка йўл қўйган филиал раҳбарлари ва масъул ходимларига нисбатан меҳнат қонунчилиги талаблари доирасида интизомий чоралар кўрилган. Жумладан, ўтган йилда мижозларга банк хизматлари кўрсатилишида амалдаги меъёрий ҳужжатлар талабларига риоя этмаган ва ишда (жумладан, лотереялар билан ишлашда) қўпол хато ва камчиликларга йўл қўйган банк филиалларининг 222 нафар раҳбар ходимига Меҳнат кодексининг ҳайфсан ва ўртача иш ҳақига нисбатан жарима қўллаш тарзидаги интизомий чора кўрилган, 91 нафар раҳбар ва бош бухгалтер эса эгаллаб турган лавозимидан озод этилган. Банк раҳбарияти томонидан фуқароларга лотереяларнинг сотилишини қатъий равишда ихтиёрийлик принципига риоя қилган ҳолда амалга ошириш ва фуқароларнинг асосли эътирозлари келиб чиқишининг олдини олиш чоралари кўриб борилади ва жараён доимий назоратга олинади. “Халқ банки”нинг Адлия вазирлигига йўллаган жавоб хатидан олинди huquqiyaxborot материаллари асосида тайёрланди. Лобар Мирзо
