Владимир Павлов эрхим багшанарта шангуудые барюулба
«Эрхим багшанарые элирүүлгын мүрысөөндэ дүй дүршэл ехэтэй, бэрхэ багшанар хабаадалсаа. Тиин эгээл бэрхэнүүд элирүүлэгдэжэ, эрхимүүдэй тоодо ороо. Үдэр бүри дээдэ гарай мэргэжэлтэд байһанаа гэршэлжэ, багшын ажалда шалгарба гээшэт. Болбосоролой һалбариин хүгжэлтэдэ хубитаяа оруулжа, һуралсалай элдэб онол аргануудые хэрэглэжэ, ажалаа һайнаар хэжэ ябанат. Багшын ажал ехэ хүндэтэй, бултандатнай баярые хүргэнэб», - гээд Владимир Павлов хэлэбэ.
Буряад Уласай Толгойлогшо, Арадай Хурал, нютагай өөһэдын хүтэлбэриин эмхинүүдэй оролдолгоор, болбосоролой талаар ехэ ажал ябуулагдана. Һуралсалай эмхи зургаануудай бааза шэнэлхэ, багшанарай мүнгэ салин ехэ болгохо гэхэ мэтэ асуудалнуудта анхарал хандуулагдадаг юм. Багшын харюусалга ехэтэй ажалһаа олон юумэн дулдыдана. Үхибүүдтэ эрдэм ном заажа, эрдэм мэдэсэ үгэхэ гээшэ юунһээшье сэнтэй.
Владимир Павловай тэмдэглэһээр, Оросой Холбооной Юрэнхылэгшэ Владимир Путинай урда табигдаһан зорилгонуудай нэгэн гэхэдэ, багшын ажалые дээшэнь үргэхэ, һургуулида хүдэлдэг мэргэжэлтэдэй ажал дэмжэхэ гэһэн удхатай.
«Хүндэтэ багшанар! Буряад Уласай Арадай Хуралай һунгамалнуудай зүгһөө мэргэжэлтэ һайндэрөөртнай үнэн зүрхэнһөө амаршалнаб. Элүүр энхые, амгалан байдалые, ажалдатнай ехэ амжалта хүсэнэб», - гээд Владимир Павлов амаршалба.
Фото: Хурал Бурятии