Баир Цыренов: «Бүгэдэ буряадуудай «Алтаргана» наадан наартай һайханаар үнгэрөө»

Монгол ороной Булганай аймагта үнгэрһэн Бүгэдэ Буряадай «Алтаргана» нааданай талаар  Буряад Уласай Арадай Хуралай Можонууд хоорондын харилсаанай, үндэһэ яһатанай асуудалнуудай, залуушуулай бодолгын, олониитын ба шажанай нэгэдэлнүүдэй талаар хорооной түрүүлэгшын орлогшо Баир Цыренов һанамжаяа элирхэйлбэ:

«Буряад Уласай Арадай Хуралай 20 һунгамал Монголдо үнгэрһэн «Алтаргана» нааданда хабаадаад ерээбди. Минии һанахада, энэ хэмжээ ябуулга үндэр хэмжээндэ үнгэрөө. Бүгэдэ буряадууд үндэһэн хубсаһаяа, буряад тэрлигүүдээ үмдэжэ, һайндэрэй жагсаалда хабаадаа. Зүрхэ сэдьхэлдэ баяр түрэжэ,ехэ омогорхожо ябааб. 2026 ондо Буряад Уласта «Алтаргана» үнгэрхэ. Эртээнһээ бэлдэжэ эхилхэбди. Хүршэ Монгол ороной манай нүхэд, найзанарнай гурбан можо нютагуудһаа ерэһэн айлшада хани халуунаар угтажа абаа. Соелой ба тамирай хэмжээ ябуулгануудые ябажа хараабди. Бүгэдэ буряадуудай «Алтаргана» наада наартай һайханаар үнгэрөөд, түүхын хуудаһан боложо ирагдаба. Түби дэлхэйгэ¬эр тарашаһан угсаата буряад арад зон Буряад Уласһаа, Үбэр Монголһоо, Үбэр Байгалһаа, Эрхүү можоһоо буряад арадай Ехэ нааданда зорижо ерээ. «Алтаргана» нааданай тэнгэри доро, аялга ду¬унай хүгжэм доро уулзажа, бүхэ барилдаа¬шад, һур харбаашад, үльгэршэд, ирагуу найрагшад, дангинанар, арадай аман зохёолой абьяастан, уран гартан, шагай нааданай, һээр шаалгын бэрхэшүүл гурбан үдэрэй туршада тэмсэжэ, эрхимүүд элирүүлэгдээ», - гээд Баир Цыренов тэмдэглээ.

Фото: Хурал Бурятии