«Real Madrid» таркибни кучайтириш учун янги номларни танлади
Испаниянинг "Реал Мадрид" клуби келгуси ёзги трансферлар ойнасида таркибини сезиларли даражада кучайтиришни мақсад қилган. "Қироллик клуби" раҳбарияти айниқса марказий ҳимоя ва таянч ярим ҳимоя чизиқларида муаммолар борлигини англаган ҳолда, ушбу позицияларга янги футболчиларни жалб этишга қарор қилди.
Манбаларга кўра, мадридликларнинг асосий нишонлари "Манчестер Сити" ярим ҳимоячиси Родри ҳамда "Боруссия Дортмунд" ҳимоячиси Нико Шлоттербек бўлиб турибди. "Реал Мадрид" ушбу икки иқтидорли футболчини ўз сафига қўшиб олиш учун клуб бюджетидан 100 миллион евро маблағ ажратишга тайёр. Таъкидлаш жоизки, "Transfermarkt" портали Родрини 75 миллион еврога, 26 ёшли Шлоттербекни эса 55 миллион еврога баҳоламоқда.
Айни дамда "қаймоқранглилар" Испания Ла Лигасида 2 ўринда бормоқда. Жамоа чемпионлик пойгасида рақобатни кучайтириш учун таркибдаги бўшлиқларни тўлдиришни устувор вазифа деб билмоқда. Агар ушбу трансферлар амалга ошса, "Реал Мадрид" ўз ўйин сифатини янада ошириши кутилмоқда.