Диего Коста Пике ва Пуйолдан узр эмас, ҳақорат сўраганини айтди
Мадриднинг "Атлетико" клуби собиқ ҳужумчиси Диего Коста "Барселона"га қарши ўйинлардаги қарама-қаршиликларни эслаб ўтди. Бу ҳақда euro-football.ru хабар беради.
Диего Симеоне қўл остида 2010-йилларнинг бошида ёрқин ўйин кўрсатган Коста кейинчалик фаолиятини Англиянинг "Челси" жамоасида давом эттирган.
Костанинг айтишича, "Барселона"га қарши баҳсларда ҳимоячилар Херард Пике ва Карлес Пуйол у билан кескин курашган, бироқ эпизодлардан кейин узр сўрашган. Ҳужумчи эса улардан узр сўрамасликни, аксинча, ўзини ҳақорат қилишларини сўраганини таъкидлади.
Унинг сўзларига кўра, "Барса"га қарши ўйинларда "Атлетико" кўпроқ ҳимояланишга мажбур бўлган ва жамоа деярли тўпни назорат қила олмаган.
37 ёшли, келиб чиқиши бразилиялик бўлган испаниялик футболчи 2025 йил бошидан бери клубсиз қолмоқда. Коста "Атлетико" сафида жами 217 та учрашув ўтказиб, 83 та гол урган.