Слуцкий бошқарувидаги «Shanghai Shenshua» турнирни мағлубият билан якунлади
Осиё Чемпионлар лигасида «Shanghai Shenshua» етти турдан сўнг плей-оффга чиқиш имкониятини бой берганди. 8-турда Леонид Слуцкий жамоаси «Buriram United»га қарши ҳеч бўлмаса турнир билан муносиб хайрлашишга уриниб кўрди, бироқ буни уддалай олмади. Бу ҳақда euro-football.ru хабар беради.
Учрашув 0:2 ҳисобида «Buriram United» фойдасига ҳал бўлди. Таиланд клуби биринчи бўлимнинг дастлабки дақиқаларида икки бор дарвозани ишғол қилди: 11-дақиқада Гуд Кертис, 22-дақиқада эса Супханат Муеанта гол урди. Орадан кўп ўтмай «Shanghai Shenshua» бир футболчисидан айрилиб, камчиликда қолиб кетди ва ўйин тақдири деярли эрта ҳал бўлди.
Маълумот учун, Леонид Слуцкий «Shanghai Shenshua» билан амалдаги шартномага эга: келишув 2027 йил охиригача мўлжалланган.