Слуцкий бошқарувидаги «Шанхай Шэньхуа» АЧЛда мағлуб бўлди
Осиё Чемпионлар лигасида етти турдан сўнг «Шанхай Шэньхуа» плей-оффга чиқиш имкониятини бой берди. 8-турда «Бурирам Юнайтед»га қарши баҳс Леонид Слуцкий жамоаси учун турнир билан хайрлашиш олдидан сўнгги имконият эди, бироқ «эшикни қарсиллатиб ёпиш» ҳам амалга ошмади. Бу ҳақда euro-football.ru хабар беради.
Учрашув 0:2 ҳисобида якунланди. Таиланд клуби биринчи бўлимнинг дастлабки қисмидаёқ кетма-кет икки бор гол урди: 11-дақиқада Гуд Кёртис ҳисобни очди, 22-дақиқада эса Супханат Муэнта устунликни иккитага оширди.
Тез орада «Шанхай Шэньхуа» майдонда бир футболчига камайиб қолди ва бу ҳолат ўйиндаги интрига деярли бутунлай сўнишига олиб келди.
Маълумот учун, Леонид Слуцкийнинг «Шанхай Шэньхуа» билан амалдаги шартномаси 2027 йил охиригача мўлжалланган.