Киву «Интер»га камбек учун нима зарурлигини айтди
Миланнинг «Интер» клуби бош мураббийи Кристиан Киву Чемпионлар лигаси плей-оффидаги «Буде-Глимт»га қарши жавоб ўйинидан нималарни кутаётганини маълум қилди. Бу ҳақда euro-football.ru хабар беради.
Италиялик гранд илк учрашувни Норвегияда 1:3 ҳисобида бой берганди. Қарама-қаршилик тақдири 24-февраль, сешанба куни «Сан-Сиро»да ҳал бўлади.
Кивунунг таъкидлашича, «Интер»га вазиятни ўнглаш учун майдонда ўзига ишонган ва юқори интенсивликда футбол керак. Мураббий биринчи ўйинда ҳам жамоасида яхши имкониятлар бўлганини, ҳатто икки бор тўп устунга текканини эслатди. Бироқ рақибнинг қарши ҳужумлари муаммо туғдирган, шу боис жавоб баҳсида бу жиҳатда янада эҳтиёткорлик талаб этилади. «Мен йигитлардан айнан ўша куни энг яхши ўйинини кўрсатишини сўрайман», деди Киву «Лечче» устидан А Сериядаги 2:0 ҳисобидаги ғалабадан кейинги матбуот анжуманида.
«Интер» – «Буде-Глимт» учрашуви 01:00 да (Тошкент вақти билан) бошланади.