Блаттер АҚШ виза сиёсатини ЖЧга таҳдид деб атади
ФИФАнинг собиқ президенти Йозефф Блаттер 2026 йилги футбол бўйича Жаҳон чемпионати олдидан АҚШнинг виза масаласидаги ёндашувини кескин танқид қилди. Турнир АҚШ билан бирга Канада ва Мексикада ўтказилиши белгиланган. Бу ҳақда euro-football.ru хабар беради.
Аввалроқ Оқ уй раҳбари Дональд Трамп 70 дан ортиқ давлат фуқароларига виза беришни вақтинча тўхтатиш бўйича фармон имзолаганди. Бу рўйхатда мундиал иштирокчилари ҳам борлиги таъкидланади.
Блаттернинг фикрича, мезбон мамлакат хорижликларга визани бермаса, у ерда Жаҳон чемпионатини ўтказиш мантиқсиз. У CBCга берган интервьюсида АҚШдаги бундай сиёсат чет элликларга нисбатан салбий кайфиятни кучайтираётганини айтди.
Шунингдек, Блаттер Дональд Трамп ва ФИФА президенти Жанни Инфантинонинг молиявий масалаларга ортиқча эътибор қаратаётганини ҳам тилга олди. Унингча, бу ёндашув мухлислар манфаатлари ҳисобига бўлаётгани мумкин.