Кейлор Навас Винисиус можароси ҳақида фикр билдирди
Мадриднинг «Реал» жамоасида аввал дарвозабон бўлиб тўп сурган Кейлор Навас Винисиус Жуниорни қўллаб-қувватлади. «Қаймоқранглилар» ҳужумчиси Чемпионлар лигасида «Бенфика»га қарши ўйинда ўзига нисбатан ирқчилик мазмунидаги ҳақоратлар бўлганини айтди ва бу ҳолатда рақиб қанот футболчиси Жанлука Престианнини айблади. Бу ҳақда euro-football.ru хабар беради.
Наваснинг таъкидлашича, Винисиус билан боғлиқ воқеа жуда ранжитади ва бундай ҳолатлар ҳеч ким билан содир бўлмаслиги керак. У таниш инсоннинг бошидан ўтса, оғриқ янада яққол сезилишини айтиб, Винига ҳам, бошқа ҳеч кимга ҳам бундай муносабат қайтарилмаслиги учун ҳамма биргаликда ҳаракат қилиши зарурлигини билдирди.
Шунингдек, Навас Мбаппенинг Престианнини дисквалификация қилиш ҳақидаги фикрига тўхталиб, аниқ қандай жазо бўлишини билмаслигини, аммо бундай ишлар албатта жазоланиши шартлигини урғулади. Унингча, атайлаб ҳақоратли гапларга йўл қўядиганларга нисбатан қатъий чоралар кўрилиши керак.
Маълумот учун, Винисиус урган гол «Реал»га плей-оффнинг илк учрашувида «Бенфика» устидан 1:0 ҳисобидаги ғалабани келтирди. Жавоб ўйини 25-февраль куни бўлиб ўтади.