Кейлор Навас Винисиус можаросини кескин қоралади
Мадриднинг «Реал» клубида ўйнаган собиқ дарвозабон Кейлор Навас Винисиус Жуниорни қўллаб-қувватлади. Ҳужумчи Чемпионлар лигасида «Бенфика»га қарши ўтган баҳсда ўзига нисбатан ирқчилик ҳақоратлари бўлганини айтди ва бу ҳолатда рақиб қанот ҳужумчиси Жанлука Престианнини айблади. Бу ҳақда euro-football.ru хабар беради.
Наваснинг таъкидлашича, Винисиус билан боғлиқ вазият уни жуда ранжитган: бундай ҳолатлар ҳеч ким билан содир бўлмаслиги керак. У шахсан танийдиган футболчи жабрланса, оғриқни янада чуқурроқ ҳис қилишини айтиб, бундай ҳодисалар на Винига, на бошқа бировга қайтарилмаслиги учун ҳамма биргаликда ҳаракат қилиши зарурлигини билдирди.
Шунингдек, Навас Килиан Мбаппенинг Престианнини четлатиш ҳақидаги фикрларига ҳам тўхталди. Унинг сўзларига кўра, қандай жазо берилиши кераклигини аниқ айтиш қийин, бироқ бундай гап-сўзлар учун албатта жавобгарлик бўлиши шарт ва атайлаб ҳақорат қиладиганларга нисбатан қатъий чоралар кўрилиши лозим.
Эслатиб ўтамиз, плей-оффнинг илк учрашувида Винисиуснинг голи «Реал»га «Бенфика» устидан 1:0 ҳисобида ғалаба келтирди. Жавоб ўйини 25 февраль куни бўлиб ўтади.