Орландо: «Милан» бу мавсумда натижани қийналиб олмоқда
«Милан»нинг собиқ футболчиси Массимо Орландо жамоа жорий мавсумда ғалаба ва очколарни жуда катта меҳнат эвазига қўлга киритаётганини таъкидлади. Унинг фикрича, «Пиза»га қарши сўнгги учрашув ҳам «россонери»нинг ҳар бир натижа учун қўшимча куч сарфлаётганини яна бир бор кўрсатди: ғалаба голи фақат 85-дақиқада урилди. Бу ҳақда euro-football.ru хабар беради.
Орландонинг айтишича, «Милан» рақиб дарвозасига биринчи аниқ зарбани ҳам биринчи бўлим охирларида йўллаган. «Умуман олганда, жамоа ижобий натижага эришишда доим муаммога дуч келади», — дея унинг сўзларини келтиради pianetamilan.it.
Эслатиб ўтамиз, Орландо ўтган асрнинг 90-йиллари ўрталарида «Милан» сафида тўп сурган. Ҳозирда клуб Италия чемпионати турнир жадвалида иккинчи ўринда бормоқда.