Мураббийлар алмашинуви авжида: топ-клубларда навбат кимда
2025/26 йилги мавсум Европанинг бир қатор грандлари учун асабий ўтмоқда: айрим клублар аллақачон бош мураббийни алмаштирди, бошқалари эса бунга жуда яқин. «Евро-Футбол.Ru» мавсум давомида топ-клублардан кетган мутахассисларни эслаб, кейинги бўлиши мумкин бўлган номларни ҳам тилга олди. Бу ҳақда euro-football.ru хабар беради.
Рубен Аморимнинг «Манчестер Юнайтед»даги даври ниҳоят якунланди. 41 ёшли португалияликнинг истеъфоси ҳақида ёзда ҳам гаплар кўп эди, бироқ клуб раҳбарияти охиригача унга ишонч билдирди. 5 январ куни вазият ўзгарди: аутсайдерларга қарши икки ўйинда бор-йўғи икки очко олингач, Аморим билан хайрлашилди. Ва бу қарор ўзини оқлаётгандек: вақтинча тайинланган Майкл Керрик дарҳол натижа бера бошлади — «Манчестер Сити» устидан 2:0, сафардa «Арсенал»га қарши 3:2, кейин «Фулҳем» (3:2) ва «Тоттенҳем» (2:0). Фақат «Вест Ҳем» билан 1:1 дуранг қайд этилди, бироқ жамоа аллақачон АПЛда 4-ўрин билан Чемпионлар лигаси зонасида.
«Челси»да эса Энсо Маресканинг ишдан олиниши кўпчилик учун мантиқсиз кўринди. Таркиб ёш, юлдузлар деярли йўқ бўлса-да, италиялик мураббий икки совринни қўлга киритди — Конференциялар лигаси ва Клублар ўртасидаги жаҳон чемпионати. АПЛда ҳам жамоа мунтазам тарзда Чемпионлар лигаси йўлланмаси учун курашди. Хориж ОАВларига кўра, масала натижаларда эмас: Мареска клубнинг трансфер сиёсати ва кам танилган ёш футболчиларга таяниш ғоясини тўлиқ қўллаб-қувватламаган. Йил бошидан бери «Челси»ни Лиам Розенор бошқармоқда, натижалар эса ҳозирча ўзгарувчан.
АПЛдаги энг янги истеъфо «Тоттенҳем»да рўй берди. 11 феврал куни лондонликлар ёзда келган Томас Франк билан ҳамкорлик муддатидан аввал тугатилганини эълон қилди. «Шпорлар» мавсум охирини кутмади: муаммоларга тўла «Ньюкасл»дан уйда 1:2 ҳисобида ютқазилгaч, мураббий мавсум ўрталаридаёқ кетди. Жароҳатлар кўплиги ва суперюлдузлар йўқлигига қарамай, 16-ўринда юриш клуб даражаси учун оғир кўринади. Франк ўрнига Игор Тудор тайинланди — «Ювентус»даги омадсиз тажрибаси фонида бу танлов ҳам баҳсли.
Тудорнинг «Ювентус»даги фаолияти ҳам алоҳида тилга олинади: хорватиялик 2025 йил мартидан октябригча туринликларни бошқарди. Дастлабдаёқ унинг келиши хато бўлиши мумкинлиги ҳақида фикрлар пайдо бўлган, аммо раҳбарият унга йиғин ўтказиб, мавсумни бошлаш имконини берди. Бироқ вақт ўтиши билан «кекса синьора»нинг ўйини янада сусайди ва истеъфо мантиқий якун бўлди. Энг қизиқ томони — Тудор ўрнига келган Лучано Спаллетти аниқ топилма бўлиб чиқди: собиқ «Наполи» ва Италия терма жамоаси устози «Ювентус»ни тезда Чемпионлар лигаси курашига қайтарди.
«Реал»да Хаби Алонсо билан хайрлашиш ҳам кутилмаган қарорлардан бири бўлди. Марескадагидек, бу ерда ҳам натижадан кўра ички муҳит кўпроқ роль ўйнагандай: манбага кўра, Алонсо футболчилар билан умумий тил топа олмади. Юлдузлар қатъий интизом, юқори прессинг ва тўлиқ назоратга кўникмаган, натижада испан мураббийи ўз фалсафасини жамоага сингдира олмади. «Реал»га кўпинча тактикадан ҳам кўра Карло Анчелотти ёки Зинедин Зидан каби сўзини ўтказа оладиган авторитет кераклиги яна бир бор эслатилди.
«Монако»да Ади Ҳюттер ҳам лавозимидан кетди. Немис мутахассиси 2023 йилда кучли старт олган, бир пайтлар ҳатто «ПСЖ»га чемпионлик пойгасида рақобат бўлиши мумкин деган таассурот уйғотган эди. Чемпионлик бўлмади, лекин Ҳюттерни тўлиқ муваффақиятсиз дейиш қийин: у жамоани кетма-кет икки марта Чемпионлар лигасига олиб чиқди, бу Александр Головин даврида клуб учун тарихий натижа сифатида кўрилади. Шунга қарамай, жорий мавсум старти омадсиз кечгач, мураббий истеъфога чиқарилди. Унинг ўрнига 38 ёшли Себастьен Поконоли тайинланди, у эса яқиндагина Бельгия ташқарисида деярли ишламаган эди.
Кейинги истеъфога энг яқин ном сифатида айнан Поконоли тилга олинмоқда. У Францияда изга тушира олмаяпти, «Монако» футболчиларининг кўпчилиги янги мураббий қўл остида кескин пасайган, Головин ҳам бундан мустасно эмас. Шунга қарамай, россиялик ярим ҳимоячи барибир майдонда энг кўзга кўринганлардан бири бўлиб қолмоқда. Россия терма жамоаси бош мураббийи Валерий Карпин ҳам Головиннинг ўйинини стадионда кузатиб, айни паллада уни «Монако»даги энг яхшилардан бири сифатида тилга олган.
«Ливерпул»да Арне Слотнинг тақдири ҳам савол остида. Манбага кўра, у клубда асосан ўтган йили қўлга киритилган чемпионлик ҳисобига қолаётгандек: агар ўшанда олтин медал бўлмаганда, нидерландиялик аллақачон жамоани тарк этган бўларди. Раҳбарият янги футболчиларга катта маблағ сарфлаган бир шароитда, Слотдан анча барқарор ва юқори натижа кутиляпти.
Рўйхатни «Ньюкасл» устози Эдди Ҳау билан якунлаймиз. Қанчалик ёқимли мутахассис бўлмасин, манбага кўра, ажралиш вақти келгандек: ҳимоядаги муаммолар ҳал бўлмаяпти, Исаак кетганидан кейин ҳужум чизиғи ҳам издан чиққан. Кўплаб жароҳатлар ва молиявий чекловлар вазиятни оғирлаштирмоқда. Устига-устак, ёзда клуб рекорд даражадаги 75 миллион евро га ҳужумчи Ник Волтемадени олиб келган, у эса «Астон Вилла»га қарши сўнгги ўйинга қадар 13 учрашув кетма-кет гол ура олмаган эди.
Дмитрий Миляев