«Марсель» бош мураббийликка яна бир номзодни кўриб чиқмоқда

Франциянинг «Марсель» клуби Роберто Де Дзерби билан хайрлашгач, бош мураббийлик бўйича янги вариантларни излашда давом этмоқда. Клуб италиялик мутахассис ўрнига яна бир номзодни рўйхатга қўшди. Бу ҳақда euro-football.ru хабар беради.

Foot Mercato хабарига кўра, Саудия Арабистонида ишлаб турган Сержиу Консейсау билан бир қаторда «Марсель» Ҳабиб Бейе номзодини ҳам кўриб чиқиши мумкин.

Ҳабиб Бейе аввал «Ренн»да бош мураббий бўлиб ишлаган. У 9 февраль куни сўнгги тўртта ўйиндаги қониқарсиз натижалар сабаб лавозимидан четлатилганди.

Ҳозирда «Марсель» чемпионат жадвалида 21 учрашувдан кейин 39 очко билан тўртинчи ўринда бормоқда. Ундан юқорида «Лион» (42), «Ланс» (49) ва «ПСЖ» (51) жойлашган.