Арбелоа 6:1 ҳисобидаги ғалабадан кейин: Бу — ҳақиқий "Реал"нинг руҳи!
УЕФА Чемпионлар лигаси умумий босқичида «Реал» ўз майдонида «Монако»ни 6:1 ҳисобида тор-мор этди. Учрашувдан кейин мадридликлар бош мураббийи Альваро Арбелоа катта ғалаба, жамоанинг руҳияти ва айрим футболчилар ҳолати ҳақида фикр билдирди.
Арбелоанинг таъкидлашича, «Сантьяго Бернабеу»даги бу тун ҳақиқий футбол байрамига айланди. У жамоа ўйинини “ажойиб” деб баҳолаб, мухлислар олдида шундай томошабоп чиқиш «Реал» учун энг тўғри йўл эканини айтди.
“Менимча, бу жуда гўзал ўйин бўлди. Ўз стадионимизда, ўз мухлисларимиз қаршисида футболчилар ўзларини эркин ҳис қилди, ўйиндан роҳатланишди, чиройли голлар уришди. Биз айнан шундай манзарани кўришни хоҳлаймиз”, — деди Арбелоа.
“Бу ғалабани мураббий эмас, футболчилар олиб берди”
Арбелоа энг муҳими — ғалаба унинг тактик “муъжиза”си эмас, футболчиларнинг меҳнати ва сифати эканини очиқ айтди. Унинг сўзларига кўра, у жамоадан катта ўзгаришлар талаб қилмаган, фақат майдонда тартиб ва жамоавий ҳаракатларга урғу берган, холос. Аммо шу “оз” нарсанинг ўзи футболчилар томонидан тез қабул қилинган.
“Бу ўйинни футболчилар ютиб берди — ўз меҳнати, ўз маҳорати, ўз характери билан. Бу янги мураббийнинг хизмати эмас. Мен улардан сўраган жуда кам нарсани дарҳол қабул қилишди. Уларнинг муносабати, менталитети менга жуда ёқди. Мана шу — «Реал Мадрид». Ҳар бир мадридиста ана шу руҳни кўришни истайди”, — деди у.
Асенсионинг жароҳати: “Умид қиламан, оғир эмас”
Учрашув давомида Асенсио билан боғлиқ ҳолат ҳам мухлисларни ўйлантирди. Арбелоа бу эпизод бўйича хотиржам изоҳ бериб, вазият жиддий тус олмаслигига умид билдирди.
“Умид қиламанки, жиддий нарса эмас. У шанба куни ҳам ўйнаб катта иш қилди. Ҳозир бироз ортиқча юклама бор эди, шунинг учун унга танаффус беришга қарор қилдик”, — деди Арбелоа.
“Бугун ҳамманинг куни эди”
Мураббий жамоанинг деярли барча етакчиларини алоҳида тилга олди. Унга кўра, майдонда ҳар бир футболчи ўз ҳиссасини қўшган, натижада «Реал» бир бутун механизм сифатида ишлаган.
“Ҳамма яхши ўйнади — Мастантуоно, Арда Гюлер, Вини, Килиан Мбаппе, Жуд Беллингем… Бугун ҳамманинг куни эди. Биз жамоавий ҳаракатларга катта эътибор қаратяпмиз ва мен бу ҳолатдан жуда мамнунман. Бу — роҳатланиш керак бўлган кеча”, — дея хулоса қилди Арбелоа “Movistar” эфирида.
Мадриддаги бу йирик ғалаба «Реал»нинг Чемпионлар лигасидаги кайфияти ва ишончини янада оширди. Энг муҳими эса — Арбелоа айтганидек, жамоа майдонда “Реал руҳи”ни кўрсата олди. Бу руҳ сақланса, «Бернабеу»даги тунлар ҳали кўп бор шундай овозга тўлади.