Розенёр Челсида Фергюсон йўлини такрорламоқчи
“Челси”нинг янги бош мураббийи Лиам Розенёр жамоада Алекс Фергюсон услубидаги ёндашувни йўлга қўйишни исташини айтди. Мутахассис ёш футболчиларга ишонч билдириш орқали катта натижаларга эришиш мумкинлигини таъкидлади. Бу ҳақда euro-football.ru хабар беради.
Розенёр журналистларга берган изоҳида аввал “Манчестер Юнайтед” мухлиси бўлганини, ҳозир эса “Челси”ни қўллаб-қувватлашини билдирди. Унинг сўзларига кўра, Фергюсон 19–21 ёшли олти-етти нафар ўйинчини бир пайтнинг ўзида майдонга туширишга журъат топган, уларга ишонган ва жамоа чемпионликни қўлга киритган. Кейинчалик эса ўша авлод клубга кетма-кет совринлар олиб келган.
Мураббий “Челси”да ҳам шунга ўхшаш йўлни босиб ўтиш учун салоҳият етарли эканини қайд этди.
Шанба куни “Челси” Англия Кубоги доирасида “Чарлтон”га қарши майдонга тушади.