Слот «Лидс»га қарши ўша телба ўйинни эслaди
«Ливерпул» бош мураббийи Арне Слот АПЛнинг 19-турида «Лидс»га қарши учрашув олдидан бўлиб ўтган матбуот анжуманида жамоалар ўртасидаги аввалги баҳс яна такрорланиши мумкинми, деган саволга муносабат билдирди. Бу ҳақда euro-football.ru хабар беради.
6 декабрь куни АПЛнинг 15-турида «Ливерпул» ва «Лидс» 3:3 ҳисобида дуранг ўйнаганди. Навбатдаги тўқнашув 1 январь куни бўлиб ўтади ва 22:30 да (Тошкент вақти билан) старт олади.
«Ҳа, буни яна бошдан кечиришим мумкин, лекин ростини айтсам, шундай кунлардан яна бирига дуч келишни хоҳламайман. Бу футбол ҳаётининг бир қисми: кўтарилишлар ҳам бўлади, пасайишлар ҳам. Шуни қабул қилиш керак. Мен учун энг катта хулоса — улар ўйиннинг сўнгги 20 дақиқасида 4-3-3 га ўтганда бизнинг қандай курашганимиз. Улар айнан ўша пайтда голларини уришди», — дея Слотнинг сўзларини клуб матбуот хизмати келтирди.
Мураббийга кўра, биринчи гол VAR аралашувидан кейин қайд этилган, иккинчи гол эса жуда чиройли чиққан. Учинчи тўп эса стандарт вазиятдан ўтказиб юборилган. Слот «Лидс» 4 ҳимоячи билан ўйнаганида «Ливерпул» кўпроқ қийналганини, 5 ҳимоячи тизимида эса бундай бўлмаганини ҳам таъкидлади.
Ҳозирда «Лидс» турнир жадвалида 16-ўринда бормоқда. «Ливерпул» эса 32 очко билан 4-поғонани эгаллаб турибди.