Отабек Жўраев: Жаҳон чемпионатида Ўзбекистон сюрприз қилишга қодир
Бугун футбол олами эътибори 2026 йилги Жаҳон чемпионати қуръасига қаратилган. Бу миқёси ва нуфузи жиҳатидан тенги йўқ мусобақада илк бор иштирок этувчи Ўзбекистон миллий терма жамоаси мухлислар қалбини ҳаяжонга солмоқда. Sports.uz шу муносабат билан таниқли шарҳловчи Отабек Жўраев билан қисқа, аммо мазмунли суҳбат ташкил қилди.
Отабек Жўраевнинг фикрига кўра, гуруҳ босқичида қайси рақиблар билан тўқнаш келишни ҳозирдан аниқ айтиш деярли имконсиз. Чунки ҳар бир саватда 12 та жамоа бор ва тўғри комбинацияни топиш эҳтимоли жуда паст. Шунга қарамай, у ўзининг орзу-гуруҳини ҳам айтди.
Унинг таъкидлашича, тўртинчи саватдан нисбатан заиф жамоа тушса, бизнинг жамоа учун катта қулайлик яратади. Жумладан, Кюрасо каби рақиб билан илк турларда ўйнаш жуда ишончли бошланиш бўлар эди. Иккинчи саватдан ўрта даражадаги, ўйини барқарор жамоа тушиши мақбул. Биринчи саватдан эса аксинча — ўта кучли рақиб, масалан, Аргентина билан беллашишни у ҳавас билан қўшимча қилди. Унга кўра, амалдаги жаҳон чемпиони билан сўнгги турда тўқнаш келиш — футболчиларимиз учун беқиёс тажриба ва мухлислар учун катта байрам бўлади. Чунки ушбу босқичга келгунча рақиб жамоа гуруҳдан чиқишни таъминлаб бўлган бўлади.
Суҳбат давомида шарҳловчи Ўзбекистоннинг гуруҳдан чиқиш имкониятларига ҳам тўхталди. У ишонч билан “Ин шаа Аллоҳ, гуруҳдан чиқамиз”, дея таъкидлаб, тахминан учинчи ўрин билан плей-офф босқичига йўл олишимиз мумкинлигини қайд этди. Кейинги босқичдаги натижа эса бевосита рақибнинг даражасига боғлиқ бўлади.
Шунингдек, Отабек Жўраев Жаҳон чемпионатидан кейин қандай футболчилар катта саҳнага кўтарилиши мумкинлиги борасида ҳам ўз фикрларини билдирди. Аввало, Элдор Шомуродов яна топ-5 лигаларидан бирига қайтиши эҳтимоли юқори экани айтилди. Шу билан бирга, Ҳожиакбар Алижонов ва Ҳусниддин Алиқуловга ҳам жиддий қизиқиш бўлиши мумкин. Учинчи қатламда эса Аббосбек Файзуллаев ва Ҳожимат Эркиновнинг ҳам катта имкониятлари борлиги таъкидланди.
Шу тариқа, Жаҳон чемпионати олдидан Ўзбекистон футболи атрофидаги қизиқиш янада ортаётгани, мухлислар эса ҳар қачонгидан купроқ ишонч ва умид билан термамизни қўллаб-қувватлаётгани сезилиб турибди. 2026 йил — яна бир тарихий саҳифа ёзилишини кутяпти.