Фаолиятида ўзгариш бўлиши кутилаётган истеъдодли ўйинчиларимиздан бири 21 ёшли Аббосбек Файзуллаев ҳисобланади.
Ҳужумкор футболчимиз 2023 йилнинг августида “Пахтакор”дан ЦСКАга кўчиб ўтиб, Россия майдонларида порлай бошлаганидан кейин унинг Европа топ-клубларига ўтиши тинмай муҳокама
қилинмоқда.
Россиялик мутахассислар орасида Аббосбек Файзуллаевнинг ўйинини юқори баҳолаб, кучли лигаларда ўйнаб кетишига ишонаётган мутахассислар кўп.
Бироқ қизиқ томони шундаки, легионеримизнинг жисмонан ихчам ўйинчи эканини биринчи ўринга қўйиб, унинг имкониятларига шубҳа билан қараётганлар ҳам топилмоқда.
Роман Шишкин, “Спартак” Москва жамоаси собиқ футболчиси:- Бу мавсум кашфиёти ким? Менга ЦСКАдаги Аббосбек Файзуллаев жуда ёқади. Лекин уни айнан бу мавсумнинг кашфиёти, деб бўлмайди. Файзуллаевни тез орада гранд клубларнинг бири олиб кетади.
Аббосбек Файзуллаев бошқа футболчилар орасида ўз ўйинлари билан яққол ажралиб турибди. Бу мавсум кашфиёти эса, Батраков бўлди. Умуман олганда, ҳар бир жамоада яхши ўйнаётган ўз етакчи ўйинчилари бор.
Владимир Пономарёв, ЦСКА собиқ футболчиси:- Мени ЦСКА ҳужум чизиғини кучайтирадиган ўйинчи олмаётгани хавотирга соляпти. Марказга пас узата оладиган қанот ҳужумчилари керак. Дарвоза олдига ўртадан кириб бўлмайди, шу боис қанот ҳужумчилари керак. Қолган позициялар жойида.
Тамерлан Мусаев олдинги чизиқда сал кўзга ташланди. Иван Обляков яхши ўйнайди, лекин унга ҳар доим нимадир етишмайди. Файзуллаев ҳужумда яхши ҳаракат қилади дейиляпти. Ҳа, шундай, лекин у жуда енгил ўйнайди.
Ҳозир ҳамма Аббосдан ҳайратланяпти. У ҳеч қандай кўрсатмалар бўлмаган кўча футболини намойиш қиляпти. Тўғри келган томонга қараб югуриб кетаверади. Бироқ дриблинги жуда яхши. Тўп билан югура олади. Жисмоний имконияти тугаса, Файзуллаев ҳам тамом бўлади.
Таъкидлаш жоизки, Аббосбек Файзуллаев учун 2024 йил муваффақиятли бўлди. Легионеримиз Осиёнинг энг яхши ёш футболчиси, Ўзбекистонда йил футболчиси совринлари билан тақдирланди. ЦСКА раҳбарияти унинг меҳнатларини инобатга олиб, шартномани янгиламаган ҳолда, маошини сезиларли даражада кўтарди.
Файзуллаев жорий мавсумда 23 та учрашувда учта гол ва олтита ассист муаллифи бўлди. Трансфермаркт портали ҳамюртимизнинг трансфер суммасини 8 миллион еврога кўтарди.
