Սոչիում հանգստացող ընտանիքը բեռնախցիկում դիակ է տեղափոխել
Չորս մարդուց բաղկացած ընտանիքը Ռուսաստանի Լիպեցկ քաղաքից հանգստանալու նպատակով Սոչի է ուղևորվել: Ճանապարհին տատիկը մահացել է, հաղորդում է Gazeta.ru-ն`հղում անելով տեղական լրատվամիջոցներին:
Նշվում է, որ 77-ամյա կինը մահացել է ճանապարհին, և նրա մահը գրանցվել է Սոչի քաղաքում: Ընտանիքի անդամները կնոջ դիակը հանձնել են դիահերձարան, քանի որ ցանկացել են նրան հուղարկավորել Լիպեցկում:
Կայքը գրում է, որ Սոչիում հանգիստն ավարտելուց հետո ընտանիքը դիակը տեղափոխելու նպատակով էքսպեդիցիոն բեռնախցիկ է ձեռք բերել: Հետդարձի ճանապարհին ընտանիքը գիշերելու համար կանգ է առել Ռոստովի մարզի մայրուղու վրա գտնվող հյուրանոցներից մեկում: Առավոտյան ընտանիքի անդամները հայտնաբերել են, որ իրենց ավտոմեքենայի տանիքին ամրացված բեռնախցիկը, որում իրենք տեղափոխելիս են եղել կնոջ դիակը, անհետացել է:
Ավելի ուշ ՌԴ ՆԳՆ մարզային գլխավոր վարչությունը հերքել է ԶԼՄ-ների տեղեկություններն այն մասին, թե կնոջ դիակը գողացել են։