Վրաստանի իշխող ուժի՝ «Վրացական երազանք»-ի հիմնադիր և պատվավոր նախագահ, մեծահարուստ Բիձինա Իվանիշվիլին հայտարարել է, որ հոկտեմբերի 26-ի խորհրդարանական ընտրությունները պետք է «Նյուրնբերգյան դատավարություն» լինեն «Ազգային շարժման» համար, որտեղ, նրա խոսքով, Վրաստանի ժողովրդի սահմանադրական մեծամասնությունը համապատասխան վճիռ կկայացնի «անհայրենիք, օտարերկրյա գործակալ քաղաքական գործիչների այդ միությանը, որոնք պատրաստ են ցանկացած հակապետական հանձնարարությունների տակ ստորագրել»։
Այս մասին Իվանիշվիլին ասել է Մցխեթայում երեկ կայացած նախընտրական հանդիպմանը։
Երեքշաբթի օրը «Վրացական երազանք»-ը հայտարարություն է տարածել, ուր նշված է, որ ընտրություններում հաղթելու և խորհրդարանում սահմանադրական մեծամասնություն ստանալու դեպքում նախկին նախագահ Միխեիլ Սաակաշվիլիի հիմնադրած «Ազգային միացյալ շարժումը» կհայտարարվի հակասահմանադրական կուսակցություն։
