ՀՀ-ում ԵՄ դիտորդների ներկայությունը վստահություն է ներշնչում սահմանամերձ տարածքների «մեկուսացված և խոցելի» բնակչությանը. նման կարծիք է հայտնել ՀՀ-ում Ֆրանսիայի դեսպանը՝ նկատի ունենալով ԵՄ դիտորդական առաքելության վերջին պարեկությունը Ներքին Հանդում:
«ՀՀ-ում ԵՄ դիտորդական առաքելությունը շարունակում է իր պարեկությունն Ադրբեջանի հետ ռազմական շփման գծում։ Եվրոպացի դիտորդների ներկայությունը վստահություն է ներշնչում այս մեկուսացված և խոցելի բնակչությանը: Առաքելությունն ապացույցն է այն բանի, որ նրանք մոռացված չեն աշխարհի կողմից»,- X-ում գրել է դեսպան Օլիվյե Դեկոտինյին:
Հիշեցնենք, որ Հայաստանում տեղակայված ԵՄ քաղաքացիական առաքելության դիտորդները պարեկություն են իրականացրել Սյունիքի մարզի Ներքին Հանդ բնակավայրում։ Այս մասին տեղեկանում ենք ԵՄ առաքելության X-ի միկրոբլոգից։
«Հայաստանում ԵՄ դիտորդական առաքելությունը երեկ բարեհաջող պարեկություն է իրականացրել հարավում գտնվող Ներքին Հանդում՝ գնահատելու մարդասիրական և անվտանգային իրավիճակը հայ-ադրբեջանական սահմանին: Առաքելության ղեկավարը և թիմը հանդիպել են գյուղապետ Խաչատուր Բաղդասարյանի հետ, որը ջերմ ընդունելություն է ցուցաբերել», - ասված է գրառման մեջ:
